Ísland tapaði, 1-0, fyrir Tyrklandi í lokaleik liðsins í undankeppni EM 2016 í kvöld. Þrátt fyrir tapið er Ísland á leiðinni á EM eins og löngu var vitað, en strákarnir okkar hafna í öðru sæti riðilsins.
Varnarleikurinn var góður í kvöld en sóknarleikurinn hefur oft verið betri. Ragnar Sigurðsson var maður leiksins að mati Vísis.
Hér að neðan má sjá einkunnir íslenska liðsins í kvöld að mati Vísis og umsögn um leikmennina:
Ögmundur Kristinsson, markvörður - 6
Gerði vel það sem hann var beðinn um að gera í leiknum. Var ekki að sjá að hann hafi verið taugaóstyrkur við erfiðar aðstæður. Var í boltanum í sigurmarkinu en hafði annars ekki mikið að gera.
Birkir Már Sævarsson, hægri bakvörður - 7
Hélt sínu vel og tók engar áhættur þegar hann kom boltanum frá sér. Skynsamur.
Kári Árnason, miðvörður - 8
Hefur verið frábær alla undankeppnina og það var engin breyting á því í gær. Enda sást lítið til sóknarmanna Tyrklands á löngum köflum í leiknum.
Ragnar Sigurðsson, miðvörður - 8*
Steig vart feilspor allan leikinn og gerði afskaplega vel þegar hann stöðvaði Arda Turan í fyrri hálfleik, þegar Börsungurinn var að sleppa í gegn. Sannkallaður klettur í vörn Íslands.
Ari Freyr Skúlason, vinstri bakvörður - 7
Enn og aftur góð frammistaða hjá Ara Frey í undankeppninni. Gerði allt sitt vel varnarlega og sýndi lipurleika fram á við inn á milli.
Jóhann Berg Guðmundsson, hægri kantmaður -6
Var í erfiðu hlutverki en náði ekki að ógna mikið. Barðist þó af miklum krafti og hjálpaði í varnarvinnunni.
Aron Einar Gunnarsson, miðjumaður - 7
Mikilvægi Arons kom enn og aftur í ljós enda einn mikilvægasti hlekkurinn í íslenska liðinu, ekki síst í varnarvinnunni. Strákarnir héldu allir betra skipulagi en í síðasta leik en Aron kom ró yfir mannskapinn.
Gylfi Þór Sigurðsson, miðjumaður - 6
Hæfileikar Gylfa er ótvíræðir en hann sýndi í leiknum að hann er öflugur og agaður varnarmaður þegar þess er krafist af honum. Hélt stöðu sinni vel á kostnað en sóknarkrafturinn varð minni fyrir vikið, sem eðlilegt er.
Birkir Bjarnason, vinstri kantmaður - 6
Átti ágætan leik og var mikilvægur þáttur í uppspili íslenska liðsins þegar strákarnir sóttu hratt fram. Sýndi aga í varnarleiknum eins og aðrir í íslenska liðinu. Mun betri í fyrri hálfleik en þeim síðari.
Jón Daði Böðvarsson, framherji - 6
Var líflegur, duglegur að sækja boltann og reyna að opna svæði fyrir félaga sína. Mátti stundum litlu muna að það hefði borið árangur.
Kolbeinn Sigþórsson, framherji - 6
Vann mikla vinnu í framlínunni og vann ófá skallaeinvígin. Komst í skársta færi Íslands í seinni hálfleik.
Ragnar bestur í Konya | Einkunnir strákanna gegn Tyrklandi

Tengdar fréttir

Ragnar: Algjört kjaftæði
Miðvörður Íslands var ekki ánægður með dóminn sem leiddi að sigurmarki Tyrklands í Konya í kvöld.

Kolbeinn: Getum gengið stoltir frá borði og brosað fram að EM
Framherja íslenska landsliðsins fannst okkar menn betri aðilinn í Tyrklandi í kvöld.

Umfjöllun: Tyrkland - Ísland 0-1 | Strákarnir töpuðu í Tyrklandi og enda í 2. sæti
Ísland getur unnið sinn riðil með sigri á Tyrkjum í Konya. Það væri sögulegt ef það markmið næst.

Aron Einar: Kári vann einvígið heiðarlega
Fyrirliðinn ánægður með leik íslenska liðsins en ósáttur við aukaspyrnuna.

Tyrkir og Króatar bættust í EM-hópinn í kvöld | Þjóðirnar átta í umspilinu
Tyrkland og Króatía tryggðu sér í kvöld sæti á Evrópumótinu í fótbolta sem fer fram í Frakklandi á næsta ári. 20 af 24 sætum í keppninni eru því skipuð.