Hanna Birna hjólaði í Morgunblaðið

Hanna Birna Kristjánsdóttir, fráfarandi varaformaður Sjálfstæðisflokksins, hélt erindi sitt á landsfundi Sjálfstæðisflokksins nú rúmlega tíu í morgun. Hún tók það sérstaklega fram að þrátt fyrir að hún léti af embætti sem varaformaður nú væri hún ekki á útleið úr stjórnmálunum.

Þá minntist hún sérstaklega á eftirtektarverða fréttaskýringu Agnesar Bragadóttur sem birist í aðdraganda fundarins.

„Mér finnst ég vera í draumastarfinu og það eru engar dramatískar breytingar í undirbúningi á því í bráð. Ég vona innilega að þetta hryggi ekki suma skýrendur, sérfræðinga eða jafnvel sjáendur í málefnum Sjálfstæðisflokksins sem þegar hafa ráðstafað mér í flest embætti hér heima og jafnvel í fjarlægum löndum og gert því skóna, sá ég í einu tímariti nýlega, að ég væri á leið í ritstjórastól á Morgunblaðinu. Það gleymdist reyndar að telja það starf upp í annars aldeilis upplýsandi fréttaskýringu þess ágæta blaðs.“

Hanna Birna minntist ekki einu orði á ráðherratíð sína í Innanríkisráðuneytinu eða þá staðreynd að hún neyddist til að segja af sér embætti þegar fram kom að aðstoðarmaður hennar hefði lekið minnisblaði úr ráðuneytinu til Morgunblaðsins og Fréttablaðsins. Hún ræddi aftur á móti brotthvarf sitt úr varaformannsstólnum.

Hanna Birna var kosin varaformaður Sjálfstæðisflokksins í aðdraganda síðustu Alþingiskosninga, snemma árs 2013. Þá tók hún við af Ólöfu Nordal, sem nú þegar hefur verið titluð varaformaður á skjá í Laugardalshöll, án þess að kosning hafi farið fram.

„Og stundum er það svo kæru vinir að kaldir vindir hafa blásið svo lengi að jafnvel þær sem þykja extra harðgerar hægri konur og eru jafnvel kallaðar ísdrottningar þegar þannig liggur á mönnum velja að stíga til hliðar. Sú ákvörðun mín nú hefur ekkert með óbilandi trú mína á hugsjónum Sjálfstæðisflokksins að gera. Hún hefur heldur ekkert að gera með þá miklu ástríðu sem ég hef fyrir verkefnunum framundan. Hún hefur heldur ekkert að gera með pólitísk áform mín til lengri eða skemmri tíma. Ég er fyrsti þingmaður Reykvíkinga. Ég verð áfram í forystusveit Sjálfstæðisflokksins,“ sagði Hanna Birna.

Þá klykkti hún út með því að það væri samt ekki skuldbinding til eilífðar: „En trúið mér ég er í stjórnmálaum, ætla að starfa þar áfram og verð á þeim vettvangi áfram. En bara til að tryggja að þessu verði ekki snúið á hvolf þá felst í þessu ekki nein skuldbinding til eilífðar. En ég sit á þingi, nýt þess mjög og vona að ég hafi umboð til að gera það áfram.“

Hanna Birna tæpti á árangri Sjálfstæðisflokksins í ríkisstjórn og hugmyndum flokksins um frelsi, skattalækkanir og val einstaklingsins.

Þá biðlaði hún til landsfundarins, líkt og Bjarni Benediktsson í ræðu sinni í gær, að tillaga sjálfstæðiskvenna um að auka hlut þeirra í störfum fyrir flokkinn yrði samþykkt.

Vísir verður á landsfundi Sjálfstæðisflokksins alla helgina.