Heimir: Hef engar áhyggjur af þessum tapleikjum

Íslenska karlalandsliðið í fótbolta mætir Slóvakíu í vináttuleik í Zilina klukkan 19.45 í kvöld, en þetta verður síðasti leikur strákanna okkar á árinu. Leikurinn verður í beinni textalýsingu á Vísi.

Ísland tapaði fyrir Póllandi, 4-2, á föstudagskvöldið, en Slóvakar, líkt og við og Pólverjar, eru búnir að tryggja sér farseðilinn á EM 2016.

Sjá einnig:Aron Einar verður ekki með gegn Slóvakíu

Lars Lagerbäck og Heimir Hallgrímsson, landsliðsþjálfarar, eru að nýta þessa tvo vináttuleiki til að gefa nýjum mönnum og þeim sem minna hafa spilað tækifæri.

Það mátti greina á leik liðsins í seinni hálfleik gegn Póllandi þar sem strákarnir fengu á sig fjögur mörk. Þetta segir Heimir vera fórnarkostnað við að prófa nýja menn.

„Skiljanlega hoppar enginn tilbúinn inn í sinn fyrsta landsleik. Það er ósanngjarnt að halda að einhver geti hoppað inn í svona taktík og spilað gallalausan leik. Það voru ákveðnir þættir samt sem voru ekki góðri gegn Póllandi og við erum búnir að fara yfir þá. Við erum að reyna að koma þessum strákum inn í það sem við erum að gera,“ segir Heimir í samtali við Vísi.

Varnarleikur eru okkar leið

Sóknarleikurinn gegn Póllandi var að stórum hluta mjög góður. Íslenska liðið skoraði tvö mörk og þau hefðu svo sannarlega getað verið fleiri. Aftur á móti slitnaði mikið á milli í varnarleiknum.

„Við lítum á það sem jákvæðan hlut að við sköpuðum nokkuð mörg góð færi en á kostnað þess gáfum við svæði sem Pólverjarnir nýttu sér. Þeir sköpuðu sér fleiri færi og nýttu þau. Við þurfum að finna einhvern meðalveg á milli þess að opna okkur of mikið en búa samt til færi,“ segir Heimir.

Sjá einnig:Einnar mínútu þögn á æfingu strákanna vegna hryðjuverkanna í París

„Það verður allt að vera í lagi hjá íslenska landsliðinu ef það ætlar að vinna lið eins og Pólland. Við verðum að vera skipulagðir og spila sterkan varnarleik. Við getum ekki farið svona „all in“ gegn liði eins og Pólverjum með öll sín einstaklingsgæði. Þeir eru vanir því að skora mörk og munu alltaf gera það ef þeir fá svona pláss.“

„Okkar leið er að spila góðan varnarleik og ein ástæða þess að okkur gengur svona vel er að við höfum haldið saman liðinu þar sem leikmennirnir þekkja vel inn á hvorn annan. Það tekur tíma fyrir nýja leikmenn að koma inn í skipulagið,“ segir Heimir.

Erfitt að hvetja menn fyrir vináttuleik

Leikmönnum íslenska liðsins hefur verið tíðrætt um að halda í sigurhefðina og koma á skriði inn á Evrópumótið. Minna hefur farið fyrir sigurleikjum undanfarið, en liðið vann ekki í síðustu þremur leikjum undankeppninnar og tapaði svo fyrir Pólverjum á föstudagskvöldið.

Þessi hrina kom þó eftir að strákarnir okkar voru búnir að tryggja sér farseðilinn á stórmót í fyrsta sinn og því minna undir. Þegar allt var undir lögðu þeir Tyrki, Tékka og Hollendinga tvisvar svo dæmi megi nefna.

Sjá einnig:Kolbeinn: Ætlum okkur eins langt og hægt er á EM

„Persónulega hef ég engar áhyggjur af þessum tapleikjum. Þetta eru ekki leikirnir sem skipta mestu máli. Íslenska landsliðið hefur aldrei spilað svona leiki sem skipta engu máli þannig séð,“ segir Heimir.

„Við getum farið í einhvern pollýönnuleik og bent á að við erum búnir að tryggja okkur á EM. Það hefur verið svolítið skrítið að fá liðið upp á tærnar fyrir þessa leiki þegar það er komið í lokakeppnina. Það er erfitt að hvetja menn upp í vináttuleik því þeir vita alveg hvað skiptir meira máli.“

„Við erum samt að stimpla inn í menn að spila vináttuleikina líka eins vel og við getum. Við erum að reyna að gera ákveðna hluti og sumir þeirra eru að takast þó sigrarnir hafa ekki dottið inn. Leikurinn gegn Tyrklandi var til dæmis góður og fyrri hálfleikurinn gegn Póllandi. Á endanum var fórnarkostnaðurinn þar of mikill,“ segir Heimir Hallgrímsson.