Upp­gjör ís­lensku þjálfaranna í dag | Sæti í undan­úr­slitum í húfi

Stórleikur kvöldsins á Evrópumótinu í Póllandi er ekki bara Íslendinga- og nágrannaslagur heldur einnig einn af lykilleikjunum í baráttunni fyrir að fá að spila um verðlaun á Evrópumótinu í ár. Danir mæta þá Þjóðverjum í lokaumferð milliriðils EM og í boði er sæti í undanúrslitum keppninnar.

Íslenska handboltalandsliðið lauk keppni eftir aðeins þrjá leiki en íslensku þjálfararnir, Guðmundur Guðmundsson með danska landsliðið og Dagur Sigurðsson með þýska landsliðið, hafa haldið uppi heiðri þjóðarinnar á mótinu.

Danir eru ósigraðir með fimm sigra í fimm leikjum og Þjóðverjar hafa unnið fjóra leiki í röð eftir að þeir komu til baka eftir tap fyrir Spánverjum í fyrsta leik. Þetta eina tap Þjóðverja á móti Spáni gæti þó reynst þeim dýrkeypt þegar lokastaða milliriðilsins er tekin saman.

Guðmundur og Dagur eru báðir á sínu öðru stórmóti með sín landslið en þrátt fyrir að Guðmundur hafi endað tveimur sætum ofar með sitt lið á heimsmeistaramótinu í Katar fékk Dagur meira hrós fyrir sína framgöngu fyrir ári. Dagur var að þróa nýtt lið og þótti gera vel með því að ná sjöunda sætinu og tryggja sig inn í forkeppni Ólympíuleikanna. Það voru hins vegar vonbrigði fyrir Dani að spila ekki um verðlaun enda að flestra mati með lið sem hafði alla burði til þess.

Sjá einnig: Dagur: Við gefumst ekki upp

Meiðsli í báðum liðum í aðdraganda EM í Póllandi þýddu að það reyndi enn meira á íslensku þjálfarana. Guðmundur missti klettinn úr vörninni (Rene Toft Hansen) en Dagur hefur verið einkar óheppinn með meiðsli manna og sú þróun hefur haldið áfram á mótinu sjálfu.

Dagur mætir í raun með hálfgert b-lið í leikinn við Dani enda búinn að missa fastamann úr öllum stöðum. Það er því meiri brekka hjá Degi en Guðmundi fyrir leik kvöldsins.

Úrræðagóðir þjálfarar

Guðmundur og Dagur hafa báðir sýnt hversu úrræðagóðir þeir eru í sínum leikjum og tilfærslur þeirra og breytingar eiga mikinn þátt í því hversu vel hefur gengið í seinni hálfleikjum liðanna.

Sjá einnig: Guðmundur fann upp á dínamíska tvíeykinu í hálfleik

Þýska liðið var þannig fjórum mörkum undir á móti Svíum en vann fyrstu fimmtán mínútur seinni hálfleiksins með átta mörkum og leikinn síðan með einu marki. Dagur notaði tvo línumenn í sókninni í seinni hálfleik sem breytti miklu fyrir sóknarleikinn.

Danska liðið var undir í hálfleik í leikjum sínum við Svartfellinga og Spánverja en vann seinni hálfleikinn í þessum tveimur leikjum með ellefu mörkum. Í leiknum við hið sterka lið Spánverja lét Guðmundur Mikkel Hansen spila sem leikstjórnanda í seinni hálfleiknum sem gekk fullkomlega upp enda kom Michael Dam­gaard frábærlega inn í vinstri skyttuna. Danir unnu seinni hálfleikinn með sjö marka mun.

Mættust á EM 2010 og HM 2015

Guðmundur og Dagur hafa mæst tvisvar sinnum með sín landslið á stórmótum, fyrst á Evrópumótinu fyrir sex árum og svo aftur á HM í Katar fyrir ári. Í bæði skiptin varð niðurstaðan jafntefli og í báðum tilfellum eftir dramatíska endurkomu annars liðsins.

Lærisveinar Dags í austurríska landsliðinu náðu þannig að vinna upp þriggja marka mun íslenska landsliðsins á síðustu 50 sekúndunum þegar Austurríki og Ísland gerðu 37-37 jafntefli í riðlakeppni EM 2010.

Í fyrra var það aftur á mótið komið að liði Guðmundar að vinna upp þriggja marka mun á lokamínútunum. Strákarnir hans Dags voru þá með þriggja marka forystu þegar rétt tæpar tíu mínútur voru eftir en Danir unnu lokakaflann 6-3 og tryggðu sér 30-30 jafntefli.

Sjá einnig: Tvær íslenskar sigurgöngur í gangi á EM í handbolta

Tveir leikir eru því að baki milli þeirra Guðmundar og Dags og hvorugur hefur fagnað sigri. Þeir þekkja það þó að fagna sigri hvor á móti öðrum enda mættust þeir átta sinnum í þýsku deildinni frá 2010 til 2014. Guðmundur og lið hans Rhein-Neckar-Löwen unnu fjóra af leikjunum átta en Dagur vann tvo.

Dagur og Guðmundur þekkjast líka mjög vel sem samstarfsmenn enda var Dagur fyrirliði Guðmundar þegar Guðmundur þjálfaði íslenska landsliðið í fyrra skiptið á árunum 2001 til 2004.

Dagur verður að vinna

Danir gerðu jafntefli við Svía í gær og eru með einu stigi meira en Þýskaland og Spánn. Jafnteflið þýðir að staða Spánverja styrktist en þeir munu með sigri á Rússum í síðasta leik riðilsins í kvöld tryggja sér sæti í undanúrslitunum, óháð því hvernig viðureign Dana og Þjóðverja fer fyrr um daginn.

Danska liðið vinnur riðilinn með því að ná að minnsta kosti jafntefli gegn Þýskalandi í dag. Með tapi er Danmörk aðeins úr leik ef Spánn vinnur sinn leik gegn Rússlandi.

Þýskaland fer áfram með sigri en eitt stig dugir aðeins ef Spánn tapar sínum leik. Með tapi eru Dagur og hans menn einfaldlega úr leik, óháð úrslitanna í leik Spánar og Rússlands.

Íslenskt handboltaáhugafólk fylgist því örugglega spennt með lokaumferð riðlakeppninnar á Evrópumeistarmótinu í handbolta í kvöld.