Framarar ætla að spila á Laugardalsvellinum í sumar

Framarar eru fluttir upp í Úlfarsárdal en þeir munu þó ekki spila þar í 1. deildinni í sumar. Keppnisleikvangur félagsins í Úlfarsárdal stenst ekki leyfiskröfur KSÍ og mun Framliðið því spila heimaleiki sína í Laugardalnum.

Í frétt á heimasíðu Fram kemur fram að vegna framkvæmda á svæði Fram í Úlfarsárdal og annarra þátta stenst keppnisleikvangur félagsins ekki leyfiskröfur KSÍ. Það er fyrirsjáanlegt er að ekki verði hægt að uppfylla þær kröfur á meðan á framkvæmdum stendur.

KSÍ hafnaði beiðni Knattspyrnufélagsins FRAM um að leika meistaraflokksleiki í 1.deild karla í Úlfársárdal í sumar og á meðan framkvæmdum stendur mun Fram því leika á Laugardalsvelli.

Einstaka leikir meistaraflokks karla munu fara fram í  Úlfarsárdal eins og leikir í Lengjubikar og fyrstu leikir í bikarkeppni  KSÍ en þeir leikir falla ekki undir jafn strangar reglur í leyfiskerfi KSÍ.

„Fram mun eftir sem áður sinna því mikla og góða starfi sem rekið er í Úlfarsárdalnum af fullum krafti og nýta þá aðstöðu sem þar er þegar til staðar. Rétt er að taka það sérstaklega fram að félagið mun spila alla heimaleiki félagsins Úlfarsárdal þegar framkvæmdir við svæði félagsins eru komnar á það stig að félagið geti uppfyllt þær kröfur sem gerðar eru til þess m.a. í leyfiskerfi KSÍ," segir í fréttinni á heimasíðu Fram.