AC Milan rétt marði Bologna

Tveir leikir fóru fram í ítölsku seríu A-deildinni í knattspyrnu í dag en Inter vann Empoli, 2-1 fyrr í dag og AC Milan lagði Bologna af velli 1-0 á útivelli í kvöld.

Það var Carlos Bacca sem skoraði eina mark leiksins fimm mínútum fyrir lok fyrri hálfleiks úr vítaspyrnu sem Luis Adriano fiskaði rétt áður. Bologna náði að koma boltanum í netið undir lok leiksins en markið var dæmt af vegna rangstöðu.

Hér að neðan má sjá eina mark leiksins sem Bacca gerði undir lok fyrri hálfleiksins.  

AC Milan komst í sjötta sæti deildarinnar með sigrinum og það sæti gefur hugsanlega sæti í Evrópudeildinni. AC Milan var stóran hluta af leiknum einum leikmanni fleiri en Diawara fékk rautt spjald á 13. mínútu.