Blaðamaður Sunday Times: Englendingar tengja Ísland við Leicester

Jonathan Northcroft, blaðamaður The Sunday Times, telur að saga íslenska landsliðsins í knattspyrnu hafi heillað marga á Englandi.

Vísir ræddi við Northcroft fyrir leik Englands og Slóvakíu í Saint-Étienne í fyrrakvöld.

„Það eru margir sem tengja íslenska landsliðið við sögu Leicester. Þeir sjá mögulega einhverja álíka töfra við velgengni íslenska liðsins,“ sagði hann en Leicester varð sem kunnugt Englandsmeistari öllum að óvörum á nýliðnu tímabili.

Sjá einnig: Ronaldo fær það óþvegið frá heimsbyggðinni eftir ummæli sín um litla Ísland

Hann segir að viðbrögð Cristiano Ronaldo, stórstjörnu Portúgals, eftir leikinn gegn Íslandi í síðustu viku hafi ýtt enn frekar undir áhugann á íslenska liðinu.

„Það er ekki mikil samúð með Ronaldo á Englandi og barnaleg viðbrögð hans eftir leikinn bættu ekki úr skák. Það hlógu allir vel að þeim,“ sagði Northcroft.

Borin virðing fyrir dugnaði

„En fyrst og fremst er virðing borin fyrir dugnaði og elju í Englandi og það er það sem við sjáum þegar við horfum á íslenska liðið spila.“

„Að sjá strákana vinna saman og njóta þess í raun og veru að vera á mótinu. Sérstaklega þegar maður ber það saman við menn eins og Ronaldo, sem strunsar af velli eftir leiki og myndi líklega frekar vilja vera í sólinni á Miami.“

Nokkur umræða hefur skapast um varnarsinnuð lið á EM og að það hafi sett svip sinn á mótin. Northcroft segir að fólk hafi gaman að varnarsinnuðum „litlum“ liðum en aðeins upp að ákveðnu marki.

„Þetta minnir mig á þegar Grikkland varð Evrópumeistari árið 2004. Fólk missti þolinmæðina þá og það gerðist meira að segja líka með Leicester í vetur. Það kemur bara að því að fólk vilji sjá meira fjör í leikjunum,“ segir hann.

„Ég veit ekki hvort að fólk hefði endilega gaman að því að sjá Ísland vinna EM með því að halda bara hreinu. En að sama skapi er fólk mjög meðvitað um sögu Íslands, hvað íbúafjölda landsins varðar og fjölda atvinnumanna í knattspyrnu sem landið á.“

Við hittumst aftur

Sjálfur er Northcroft skoskur en Skotland er eina landið á Bretlandseyjunum sem ekki náði að vinna sér þátttökurétt á EM í Frakklandi.

„Ég lít á Norðurlöndin og Ísland sem bræður okkar. Skotar hafa alltaf notað veðrið sem afsökun fyrir því að það hefur gengið illa að búa til góða knattspyrnumenn. En Ísland hefur nú náð að afsanna það. Fyrir vikið er það enn meira svekkjandi að við séum ekki með á þessu móti.“

Northcroft hefur fulla trú á því að Ísland geti farið áfram í 16-liða úrslitin en til þess þurfa strákarnir að ná að minnsta kosti jafntefli gegn Austurríki í París á morgun. Og hann reiknaði jafnvel með því að andstæðingurinn myndi verða England.

Viðtalið fór fram eins og áður segir fyrir leik Englands gegn Slóvakíu í gær en með sigri í leiknum hefðu Englendingar tryggt sér sigur í riðlinum.

„England hefur þann ótrúlega vana að vinna ekki riðlana sína á stórmótum. Liðinu hefur fundið ótrúlegar leiðir til að fá erfiðari leiki í útsláttarkeppninni en þeir þurfa,“ sagði Northcroft þá.

Það kom svo í ljós að hann hafði rétt fyrir sér. Leiknum lyktaði með markalausu jafntefli og England mætir liðinu sem endar í öðru sæti F-riðils í 16-liða úrslitunum á mánudag. Ísland er sem stendur í öðru sæti F-riðils, fyrir lokaumferðina í riðlakeppninni á morgun.

Ekki missa af neinu sem gerist á EM í Frakklandi. Vísir er með hóp fjölmiðlamanna á mótinu sem færa ykkur allar nýjustu fréttirnar af strákunum okkar. Fylgdu okkur á Facebook, Twitter og Snapchat (sport365).