Ljótar pítsur á leið til Bandaríkjana

Við byrjum á einum og þeir stefna á að vera búnir að opna 30 um mitt næsta ár. Þeir ætla að byrja á að opna í Portland í Oregon,“ segir allskonarmaðurinn Unnar Helgi Daníelsson um útrás pitsustaðarins Ugly.

Auk pitsustaðarins á Unnar og rekur skemmtistaðinn Dúfnahóla 10 ásamt Arnari Finni Arnarsyni og á einnig fyrirtækið Reykjavík Rocks.

Reykjavík Rocks sérhæfir sig í að skemmta útlendingum, sem vill til að eru oft vel stæðir, og var það einmitt í gegnum fyrirtækið sem Unnar komst í kynni við Taylor Sause sem ólmur vill Ugly til Bandaríkjanna.

Fyrir þá sem ekki vita þá er sérstaða pitsustaðarins Ugly fólgin í áður óþekktri fjölbreytni í pitsubotnum en boðið er upp á blómkáls- og kjötbotna auk hefðbundnari deig- og speltbotna.

Var það kannski blómkálsbotninn sem náði athygli Bandaríkjamannsins? „Hann var kúnni hjá mér í gegnum Reykjavík Rocks og kom bara hingað sem ferðamaður. Þannig kynnist ég honum. Svo var hann forvitinn um hvað ég var að gera og ég fór að útskýra fyrir honum þessa blómkálsbotna,“ segir Unnar og heldur áfram að útskýra hvernig útrásin kom til: „Svo kom hann og skoðaði þetta fyrir tveimur mánuðum. Síðan þá hefur þetta bara gerst ótrúlega hratt.“

Ekki er langt síðan Ugly var opnað, en tveir staðir eru starfræktir á höfuðborgarsvæðinu; í Kópavogi og Grafarvogi. Stefnan er svo sett á að opna þriðja staðinn hér á landi á þessu ári en sá verður í Hafnarfirði. En á mánudaginn mun staðurinn einnig hefja samstarf sitt við kleinuhringjavagninn Dons Donuts. Stefnt er að opnun í Portland í byrjun október í gömlu verslunarhúsnæði sem breytt verður í veitingastað.

Unnar Helgi er að vonum stoltur af árangrinum og hlakkar til komandi tíma. „Oftast tekur maður öllu með fyrirvara, þegar fólk er svona að segja hitt og þetta. Sérstaklega Ameríkanar. En svo er þetta bara „for real“. Ég fer út eftir tvo mánuði og hjálpa þeim að opna fyrsta staðinn,“ segir hann spenntur og segir að stefnan hafi alltaf verið sett á að gera Ugly að keðju.

Konsept staðarins mun að sögn eigandans haldast óbreytt en boðið verði upp á nýja vöru þarna ytra sem hann segir að sjokkera muni Íslendinga. „Ég veit ekki alveg hvort ég vil segja frá því strax. Þetta alveg nýtt hjá okkur og nýtt alls staðar og er kannski svolítið viðkvæmt fyrir marga,“ segir hann dularfullur þegar hann er inntur eftir því um hvaða nýjung er að ræða.

Auk veitingastaðarins verða blómkálsbotnar framleiddir í auknu magni og seldir í heilsumatvöruverslunum.  „Við erum að stefna á að gera það á Íslandi líka svo fólk geti búið til blómkálspítsu heima hjá sér án þess að þurfa að eyða hellingstíma í það,“ segir Unnar Helgi og bætir við að samkvæmt hans vitneskju verði þeir fyrstir allra í heiminum til þess að framleiða blómkálsbotna til sölu. „Ég er búinn að vera að skoða markaðinn vel, sá ekkert svona og hugsaði bara: Já ókei, þarna er ég með eitthvað.“

Greinin birtist fyrst í Fréttablaðinu 15. júlí.