Guðni Th. brýtur blað: Fyrsti forsetinn í heiminum til að taka opinberlega þátt í gleðigöngu hinsegin fólks

Guðni Th. Jóhanesson, forseti Íslands mun ávarpa Gleðigöngu hinsegin fólks sem fram fer í Reykjavík í dag. Er hann fyrsti forseti Íslands til að gera það en samkvæmt vefnum Gay Iceland er hann jafnframt fyrsti forsetinn í heimunum til þess að taka opinberlega þátt í gleðigöngu hinsegins fólks.

Guðni er í viðtali við Gay Iceland og segir þar að hann hafi árum saman fylgst með gleðigöngunni ásamt þúsundum Íslendinga og hann ætli sér ekki að breyta út af vananum í þetta skipti þrátt fyrir að vera orðinn forseti.

Hann hafi því ekki hikað við að segja já þegar honum var boðið að taka þátt í þetta skiptið.

Á Gay Iceland segir að Justin Trudeau, forsætisráðherra Kanada, hafi vissulega tekið þátt í gleðigöngum þar í landi en að Guðni sé fyrsti forsetinn í heiminum til að taka þátt.

Gleðigangan í Reykjavík fer fram í dag klukkan tvö, en gengið verður frá BSÍ og að Arnarhóli. Þar mun svo fara fram skemmtidagskrá þar sem fjölmargir listamenn koma fram, meðal annars Páll Óskar.