Anton Brink, ljósmyndari Vísis og Fréttablaðsins, náði flottum myndum af Hrafnhildi í lauginni í Ríó í nótt og má sjá þær hér fyrir ofan.
Hrafnhildur Lúthersdóttir náði ellefta besta tímanum í undanúrslitunum eftir að hafa verið með fimmta besta tímann í fyrri riðlinum. Sex konur syntu hraðari en hún í seinni riðlinum þegar það máttu bara þrjár komast upp fyrir hana.
Hrafnhildur Lúthersdóttir synti á 2:24.41 mínútum eða tveimur sekúndubrotum hraðar en í dag en hefði þurft að synda á 2:22.86 mínútum til þess vera ein af þeim átta sem komust í úrslitin. Íslandsmet hennar er 2:22,96. mínútur.
Hrafnhildur Lúthersdóttir var með tíunda besta tímann í undanrásunum en hún synti þá á 2:24.43 mínútum. Hún datt því niður um eitt sæti.
Ástralska sundkonan Taylor McKeown var með bestan tímann í undanúrslitunum en hún synti á 2:21.69 mínútum eða 2,72 sekúndum hraðar en Hrafnhildur gerði. Rússinn umdeildi Yuliya Yefimova komst aftur í úrslit eins og í 100 metra bringusundinu.
Hrafnhildur Lúthersdóttir náði engu að síður frábærum og sögulegum árangri á þessum Ólympíuleikum en hún varð einnig í sjötta sæti í 100 metra bringusundi.
