Stelpurnar skutust áfram í úrslitin

Tvö íslensk lið keppa til úrslita á EM í hópfimleikum á föstudaginn.

Fyrr í dag tryggði blandað lið Íslands í unglingaflokki sér örugglega sæti í úrslitum og nú í kvöld lék stúlknaliðið sama leik.

Ísland endaði í 2. sæti af níu liðum og var aðeins 0,50 stigum á eftir Dönum sem urðu hlutskarpastir. Svíar urðu í 3. sæti en þessi þrjú lið skáru sig svolítið úr. Finnar, Norðmenn og Bretar komust einnig áfram í úrslitin sem fara sem áður sagði fram á föstudaginn.

Íslensku stelpurnar hófu leik á trampólíni og fengu 17,300 stig fyrir þær æfingar.

Ísland var í 2. sæti eftir 1. umferðina en skaust upp í það fyrsta eftir gólfæfingarnar sem skiluðu stelpunum 20,050 stigum.

Stökk á dýnu voru síðust á dagskrá hjá íslenska liðinu. Ísland fékk 15,000 stig fyrir þær æfingar og datt fyrir vikið niður í 2. sætið.

Það skiptir þó ekki öllu. Stóra prófið er á föstudaginn og þar ætla íslensku stelpurnar sér að komast á pall.

Á morgun er svo komið að fullorðinsliðunum. Klukkan 14:00 hefst keppni í blönduðum flokki og klukkan 16:15 í kvennaflokki.

Bein lýsing: EM í hópfimleikum:

18:30

Ísland fékk 15,000 stig fyrir æfingar á dýnu. Stelpurnar enda því í 2. sæti með 52,350 stig, 0,50 stigum á eftir Dönum. Svíar tóku svo 3. sætið.

18:03

Íslensku stelpurnar fá 20,050 stig fyrir gólfæfingarnar. Ísland hefur því tekið forystuna, er með 37,350 stig, 0,65 stigum á undan Dönum. Ísland verður því með tvö lið í úrslitum á föstudaginn.

17:55

Víkingaklapp!

17:47

Íslensku stelpurnar voru að enda við að klára gólfæfingar. Flest í toppstandi þar. Það verður gaman að sjá hversu háa einkunn þær fá. Hún hlýtur að vera yfir 20,000.

17:23

Ísland fær 17,300 stig fyrir trampólínið og skýst þar með upp í 2. sætið. Danir eru efstir en þeir fengu 21,000 stig fyrir æfingar á gólfi.

17:15

Ísland lýkur fyrri umferðinni með trampólínæfingum. Stelpurnar afgreiddu þetta ljómandi vel. Nú bara spurning hvað dómurunum fannst um þetta.

16:14

Nú tökum við smá hlé áður en keppni í stúlknaflokki hefst.

16:12

Allar einkunnir komnar í hús. Ísland endar í 3. sæti með 53,416 stig. Danir urðu efstir með 56,516 stig og Norðmenn í 2. sæti með 56,050 stig. Svíar, Ítalir og Bretar komust einnig áfram.

16:08

Ísland fékk 20,176 í einkunn fyrir gólfæfingarnar sem fleytir liðinu örugglega í úrslit. Lokastaðan liggur ekki fyrir alveg strax en Ísland verður aftur á meðal keppenda á föstudaginn. Það er hægt að slá því föstu.

15:45

Íslensku krakkarnir voru að klára æfingar á gólfi. Við erum væntanlega að tala 20,000 plús í einkunn fyrir þær. Ísland er sem stendur í 4. sæti en sex efstu liðin fara áfram í úrslit.

15:15

Íslensku krakkarnir fengu 17,000 fyrir æfingar sínar á trampólíni. Ísland er því komið með 33,566 stig eftir fyrstu tvær æfingarnar. Nú eru gólfæfingarnar bara eftir.

15:12

Æfingar á trampólíni eru að baki og gengu virkilega vel. Lendingarnar virtust betri en áðan. Nú er bara að bíða eftir einkunninni.

14:53

Fjögur lið eru búin að fá einkunn. Ísland er í 2. sæti á eftir Noregi sem fékk 18,100 stig fyrir æfingar sínar á trampólíni.

14:45

Ísland fékk 16,200 í einkunn fyrir stökkin. Það telst viðunandi.

14:38

Íslenska liðið hefur lokið sér af. Næst er það trampólínið.

14:35

Íslenska liðið byrjar á stökki.

14:30

Þýska liðið byrjar á gólfæfingum.

14:20

Blandaða unglingaliðið ríður á vaðið. Alls eru níu lið sem taka þátt. Auk Íslands eru það Þýskaland, Noregur, Holland, Ítalía, Slóvenía, Bretland, Svíþjóð og Danmörk. Íslenska liðið er númer tvö í röðinni.

14:18

Ísland sendir fjögur lið til leiks. Blandaða liðið í unglingaflokki og stúlknaliðið keppa í dag.

14:15

Góðan daginn og velkomin í beina lýsingu frá EM í hópfimleikum sem fer fram í Lukna höllinni í Maribor í Slóveníu.