Antonov-þotunni seinkar fram á nótt

Stærstu flugvél heims, hinni risastóru Antonov 225, sem væntanleg var til Íslands klukkan 21 í kvöld, seinkar fram á nótt. Nú er áætlað að flugvélin lendi í Keflavík klukkan 1.45 eftir miðnætti og er það óstaðfestur tími, að sögn starfsmanna Airport Associates, sem annast afgreiðslu þotunnar.

(Innskot. Flugvélin er nú áætluð kl. 15.15, laugardag. Sjá nánar hér.)

Engin skýring hefur fengist á seinkuninni en þýskir fjölmiðlar greindu frá því að eldur hefði komið upp í einum sex hreyfla hennar eftir lendingu í Leipzig í gær.

Standist nýi lendingartíminn er flugtak áætlað frá Keflavík klukkan 4.15 í nótt. Flugvélin millilendir á Íslandi til eldsneytistöku á leið sinni frá Þýskalandi en heldur síðan för sinni áfram áleiðis til Santiago í Chile.

Fylgjast má með flugi vélarinnar á vefnum Flightradar 24.