Guðni gaf Bjarna, Katrínu og Birgittu bók eftir sjálfan sig

Þau Bjarni Benediktsson, formaður Sjálfstæðisflokksins, Katrín Jakobsdóttir, formaður Vinstri grænna, og Birgitta Jónsdóttir, þingflokksformaður Pírata, fengu öll góða gjöf frá Guðna Th. Jóhannessyni, forseta Íslands, með stjórnarmyndunarumboðinu.

Gjöfin var bók eftir Guðna sjálfan, Völundarhús valdsins, sem fjallar um forsetatíð Kristjáns Eldjárns. Bókin kom út árið 2005 en Guðni hafði tveimur árum áður lokið doktorsprófi í sögu frá Queen Mary University í London.

Birgitta upplýsti um gjöfina í Kastljósi í kvöld þar sem forystufólk flokkanna sem sæti eiga á Alþingi kom saman í sjónvarpssal til að ræða stöðuna í stjórnarmyndunarviðræðunum við þau Þóru Arnórsdóttur og Baldvin Þór Bergsson.

Þóra spurði Birgitta hvernig hún hefði upplifað stjórnarmyndunarviðræðurnar og þær þreifingar sem átt hafa sér stað á milli flokkanna á þeim rúmu sex vikum sem liðnar eru frá kosningum. Nefndi Þóra í því samhengi að formaður Sjálfstæðisflokksins hefði kallað þetta völundarhús þar sem maður væri alltaf að ganga á vegg.

„Ja, kannski á alveg svona dramatískan hátt og hann lýsir því en það vill nú svo til að allir þeir sem hafa fengið þetta umboð hafa fengið Völundarhús valdsins að gjöf frá forseta lýðveldisins og það minnir mann á að þetta er svo sannarlega ekki í fyrsta skipti sem það tekur einhvern smá tíma,“ sagði Birgitta og vísaði í það í forsetatíð Kristjáns reyndist oft afar erfitt fyrir stjórnmálamennina að mynda ríkisstjórn.