Hrafnhildur með sitt fimmta Íslandsmet á HM en komst ekki í úrslit

Sundkonan Hrafnhildur Lúthersdóttir varð í fjórtánda sæti í undanúrslitum i 100 metra bringusundi í nótt á HM í 25 metra laug í Windsor í Kanada.

Hrafnhildur varð í sjöunda sæti í sínum riðli á nýju Íslandsmeti en hún varð þá sú fyrsta til að synda 100 metra bringusund á undir 1:06 mín.

Hrafnhildur kom í mark á 1:05,67 mín. og bætti Íslandsmet sitt frá því fyrr í dag um 39 hundraðshluta sem er heilmikil bæting. Hún hefði þurft að synda á 1:05,20 mín. til að komast í úrslit.

Hrafnhildur var með fjórtánda besta tímann í undanrásunum þegar hún bætti sitt eigið Íslandsmet frá Íslandsmeistaramótinu 2015 með því að koma í mark á 1:06,06 mín.

Hrafnhildur synti á fyrstu braut í fyrri riðlinum. Hún var í fimmta sæti eftir fyrstu 50 metrana sem hún synti á 31,05 sekúndum en hún hafði synt fyrstu 50 metrana á 31,73 sekúndum fyrr um daginn. Hrafnhildur datt niður um tvö sæti á síðari 50 metrunum.

Hrafnhildur hefur sett fimm Íslandsmet í þeim þremur einstaklingsgreinum sem hún hefur tekið þátt á HM, tvö í 50 metra bringusundi, tvö í 100 metra bringusundi og eitt í 100 metra fjórsundi.

Hrafnhildur hefur náð hæst í 11. sæti í 100 metra fjórsundi en hún varð í 13. sæti í 50 metra bringusundi og svo í 14. sætinu í 100 metra bringusundinu.