Enn einn glansleikurinn hjá Martin

Martin Hermannsson átti enn einn stjörnuleikinn þegar Charleville-Mézières bar sigurorð af Lille, 70-76, í frönsku B-deildinni í körfubolta í kvöld.

Martin skoraði 25 stig í leiknum og var stigahæstur í liði Charleville-Mézières. Hann tók einnig sex fráköst og gaf sex stoðsendingar. Íslenski landsliðsmaðurinn hitti úr átta af 14 skotum sínum utan af velli og nýtti öll sex vítin sín.

Charleville-Mézières er í 2. sæti deildarinnar með 10 sigra og þrjú töp.

Það hefur heldur betur birt til hjá Hauki Helga Pálssyni og félögum í Rouen. Þeir unnu fjögurra stiga sigur á Blois í kvöld, 72-68, og eru komnir upp úr fallsæti.

Haukur Helgi var traustur í leiknum í kvöld. Hann spilaði í 35 mínútur; skoraði sjö stig, tók sex fráköst og gaf fjórar stoðsendingar.

Martin, Haukur Helgi og aðrir leikmenn deildarinnar fá nú smá frí en keppni hefst að nýju 13. janúar.