Almenningur duglegur að skila inn skattframtölum

Á annað hundrað þúsund einstaklingar hafa nú þegar skilað inn skattframtali en almennur frestur til að skila inn framtali rennur út á morgun. Ríkisskattstjóri segir heldur fleiri búin að skila en á síðasta ári og þá verði álagningin annað árið í röð tilbúin fyrr en áður var.

Síðasti dagur launafólks til að skila inn skattframtali er á morgun, 15. mars. Allstór hópur hefur hins vegar sótt um frest til að skila inn framtali og segir Skúli Eggert Þórðarson ríkisskattstjóri að sá framlengdi frestur renni yfirleitt út í kring um 20. mars. Þá geti endurskoðendur og bókarar skilaði framtölu fyrir sína skjólstæðinga eitthvað fram í apríl.

„En skilin hafa verið mjög góð. Þetta hefur gengið mjög vel á þessari vertíð og eru töluvert betri heldur en í fyrra. Nú þegar eru komin á annað hundrað þúsund framtöl. Þótt við eigum eftir stærsta daginn sem er á morgun og svo í dag. Þannig að þetta er töluvert fyrr á ferðinni en verið hefur undanfarin ár,“ segir Skúli Eggert.

Skattframtölin hafa verið að þróast mikið á undanförnum árum þannig að venjulegt launafólk þarf nánast aðeins að staðfesta framtöl sín á netinu, þar sem flestar upplýsingar eru færðar sjálfkrafa í framtalið.

„Nú er þetta orðið þannig að við erum með það góða upplýsingavinnslu að við getum útbúið framtal fyrir þorra gjaldenda. Okkar viðskiptavinir þurfa ekki að gera annað í mjög mörgum tilfellum en að opna framtalið, skoða það, yfirfara upplýsingarnar og síðan staðfesta,“ segir ríkisskattstjóri.

En þótt vel gangi segir Skúli Eggert að töluvert hafi verið að gera í þjónustuveri Skattsins undanfarna daga. Þangað hafi til að mynda komið um átta hundruð manns í gær til að fá aðstoð og símtölin hafi verið um þrjú þúsund. Álagningu skatta á almenning lýkur fyrr nú en á undanförnum árum.

„Þetta er sem sagt annað árið sem við munum leggja álagninguna fram mánuði fyrr. Hún ætti að vera tilbúin hjá okkur 30. júní núna í ár. Það er í annað skiptið sem við gerum það. Áður vorum við að leggja þetta fram um mánaðamótin júlí-ágúst. Sem var óheppilegur tími vegna þess að þetta var mitt í sumarorlofi langflestra landsmanna. En með því að leggja þetta fram 30. júní eru langflestir sem sjá þetta áður en þeir fara í orlof og fá síðan endurgreiðslurnar fyrr sé um það að ræða. Það að auki var kærufrestur lengdur úr þrjátíu dögum í sextíu daga,“ segir Skúli Eggert Þórðarson.