Ívið betri kjörsókn í formanns –og stjórnarkjöri VR en síðast

Þátttaka í atkvæðagreiðslu félagsmanna í VR um næsta formann félagsins og fulltrúa í stjórn þess, er ívið betri en þegar síðast var kosið um embætti formanns. Atkvæðagreiðslan hófst fyrir þremur dögum og lýkur á þriðjudag.

VR er fjölmennasta stéttarfélag landsins en rúmlega 32 þúsund og sjöhundruð félagsmenn hafa atkvæðarétt í formanns -og stjórnarkjöri sem hófst með rafrænum hætti hinn 7. mars. Síðast var kosið um embætti formanns í VR árið 2013 og var Ólafía B. Rafnsdóttir þá kjörin með 76,1 prósenti atkvæða en Stefán Einar Stefánsson hlaut 23,9 prósent atkvæða.

Ólafía býður áfram fram krafta sína í formannsembættið en Ragnar Þór Ingólfsson stjórnarmaður í VR býður sig fram á móti henni. Jakob Þór Einarsson starfsmaður kjörstjórnar VR segir atkvæðagreiðsluna hafa gengið vel.

„Svona miðað við söguna okkar er þetta ágætis þátttaka. Eftir þrjá daga núna vou um hálf ellefu leytið í morgun 3.188 búnir að kjósa. Ef við gerum samanburð við 2013 þá voru eftir fimm daga 3.300 búnir að kjósa. Þannig að við munum ná því og vel það fyrir þann tíma,“ segir Jakob Þór. Það stefni því í að heildarkjörsókn verði betri en árið 2013.

Kosningin fer fram rafrænt.

„Fólk fer inn á heimasíðu VR og finnur þar tengil á kosninguna. Þar fer það inn á atkvæðaseðil og þarf að nota annaðhvort Íslykil eða rafræn skilríki í gegnum síma,“ segir Jakob Þór. Fólk sem haldið sé feimni gagnvart tölvum geti komið á skrifstofu VR og kosið og fái þá aðstoð við að verða sér út um Íslykil hafi það ekki þegar gert það.

En það er ekki einungis verið að kjósa formann í VR til næstu tveggja ára því einnig eru kjörnir sjö fulltrúar í stjórn félagsins en ellefu bjóða sig fram í þau sæti. Jakob Þór segir töluverða spennu ríkja fyrir kjörinu.

„Já maður finnur fyrir því. Fólk er að kanna stöðu sína, hvort það sé ekki örugglega á kjörskrá og ýmislegt svoleiðis. Við erum að aðstoða fólk við að finna út úr því. Ég finn talsverðan mun á því heldur en í kosningum í fyrra þar sem var bara stjórnarkosning. Það er meira einhvern veginn alltaf undir í formannskosningu,“ segir Jakob Þór.

Formanns- og stjórnarkjöri VR lýkur klukkan tólf á hádegi næstkomandi þriðjudag og ættu úrslitin að liggja fyrir opinberlega upp úr klukkan eitt þann sama dag.