Miðasalan á Króatíuleikinn hefst á hádegi á morgun og miðarnir gætu verið fljótir að fara

Dýrustu miðarnir á leik Íslands og Króatíu í undankeppni HM 2018 munu kosta sjö þúsund krónur en þeir ódýrustu þrjú þúsund krónur.

Ísland spilar næsta leik sinn í undankeppni HM á móti Króatíu á heimavelli og fer leikurinn fram á Laugardalsvellinum 11. júní næstkomandi. Leikurinn er á sunnudagskvöldi klukkan 18.45.

Það hefur oft verið mikið fjör í kringum miðasölu á leikjum íslenska karlalandsliðsins í fótbolta en um afar eftirsótta miða að ræða.

Miðasalan á Króatíuleikinn hefst klukkan 12:00 á morgun, föstudaginn, 5. maí, og fer miðasalan fram í gegnum miðasölukerfi hjá www.midi.is.

Ísland og Króatía eru í tveimur efstu sætum riðilsins en Króatar eru með þriggja stiga forskot á Íslendinga þökk sé sigri þeirra í innbyrðisleik liðanna í Zagreb í nóvember. Aðeins efsta lið riðilsins er öruggt með sæti á HM í Rússland en liðið í öðru sæti gæti komist í umspilsleiki.

Eins og undanfarin ár verður boðið upp á barnaverð fyrir 16 ára og yngri sem er 50% af fullu miðaverði. Hægt er að velja barnaverð í kaupferlinu.

Mest er hægt að kaupa 4 miða á hverja kennitölu.  Samkvæmt miðaskilmálum KSÍ og Miða.is er með öllu óheimilt að nota aðgöngumiða frá KSÍ í markaðslegum tilgangi, eins og t.d. að gefa í leikjum á samfélagsmiðlum eða á öðrum miðlum. Verði einhver uppvís af slíku áskilur KSÍ sér rétt til að ógilda miðann.

Verð miða á landsleik Íslands og Króatíu:

Rautt svæði - 7.000 krónur (Nýja stúkan)

Blátt svæði - 5.000 krónur (Gamla stúkan)

Grænt svæði - 3.000 krónur (Sæti sitthvorum megin við nýju stúkuna