Engin viðbrögð við aðvörun flugmanna

„Það hefði getað skapast háskalegt ástand ef þetta hefði gerst milli þrjú og fjögur um daginn,“ segir Ingvar Tryggvason, formaður Öryggisnefndar Félags íslenskra atvinnuflugmanna, um óhappið sem varð er farþegaþota Primera Air fór út af braut í lendingu á Keflavíkurflugvelli klukkan rúmlega fimm á föstudaginn.

Ingvar segir að hefði óhappið orðið á háannatíma hefði fjöldi véla þurft að hverfa til varaflugvalla. Þar sé um að tefla Reykjavík, Akureyri og Egilsstaði. Það hamli síðarnefndu völlunum tveimur að þar sé aðeins pláss fyrir fjórar þotur á hvorum stað. Ef Keflavíkurflugvöllur lokist til dæmis vegna snjókomu sé oft snjókoma í Reykjavík sömuleiðis.

„Þessi varaflugvallamál eru í ólestri og við höfum ítrekað bent stjórnvöldum á það en engin viðbrögð fengið,“ segir Ingvar.

Guðni Sigurðsson, upplýsingafulltrúi Isavia, segir að flugvellirnir á Egilsstöðum, Akureyri og Reykjavík taki tuttugu til þrjátíu flugvélar. „Það er það sem er á klukkustund þegar mest lætur í Keflavík,“ bendir hann á. Þoturnar komi eins og perlufesti að Keflavíkurflugvelli, þær öftustu á leið frá Evrópu séu nær Skotlandi en Íslandi og geti snúið þangað til lendingar lokist völlurinn.

„Það væri þægilegt að hafa stærri flughlöð á Egilsstöðum og Akureyri en við getum á öðrum flugvöllum en Keflavíkurflugvelli tekið á móti umferðinni sem er þar á um einum klukkutíma eða vísað vélunum yfir á aðra flugvelli,“ segir Guðni.

Varðandi atvikið á föstudag segist Ingvar hvorki vilja hrapa að ályktunum né alhæfa neitt. „En það eru óneitanlega vísbendingar þarna á ferðinni. Snjóhreinsun í Keflavík hefur verið svolítið umfjöllunarefni,“ vekur hann athygli á. „Það eru sterkar vísbendingar um að það þurfi að setja meiri kraft í snjóhreinsun á Keflavíkurflugvelli og mér skilst að það standi til bóta næsta haust.“

Guðni segir það vissulega rétt að bæta þurfi við tækjum í snjómokstri en það sé vegna þess að bætt hafi verið við flugvélastæðum svo svari til átján fótboltavalla. „Hálku­varnir og snjóvarnir á Keflavíkurflugvelli eru með því besta sem gerist í heiminum, það er bara staðreynd. Það er ekkert til sparað,“ segir hann.

Að sögn Ingvars er mjög mikilvægt að komist sé sem fyrst að orsökum óhappsins á föstudag sem og orsökum allra annarra óhappa og slysa í fluginu.

„Það er geysilega mikið af góðu fólki að vinna í flugiðnaðinum á Íslandi en það eru sterkar vísbendingar um að rannsóknarnefnd samgönguslysa þurfi að fá aukin fjárframlög,“ segir Ingvar og vísar til laga um rannsókn samgönguslysa þar sem viðmiðið sé að rannsóknarskýrslur komi út innan eins árs.

„En þetta hefur verið að dragast úr hófi fram. Maður spyr sig hvort það geti verið að þetta sé eins og með Matvælastofnun; að þarna þurfi meiri peninga til að auka afköstin. Það er náttúrlega grundvallarflugöryggismál þegar það verður óhapp eða slys að niðurstaðan um orsakirnar komi fram sem allra fyrst til þess að það sé hægt að gera fyrirbyggjandi ráðstafanir þannig að slíkur atburður endurtaki sig ekki.“