Dagný í hópnum sem mætir Írlandi og Brasilíu

Freyr Alexandersson, landsliðsþjálfari kvenna í fótbolta, valdi 24 leikmenn í hópinn sem mætir Írlandi og Brasilíu í vináttuleikjum í byrjun næsta mánaðar.

Stærstu fréttirnar eru þær að Dagný Brynjarsdóttir snýr aftur en hún gat ekki verið með síðustu tveimur leikjum vegna meiðsla. Dagný er enn þá að glíma við meiðslin og er ekki farin af stað með liði sínu Portland Thorns.

Elísa Viðarsdóttir er heldur ekki með þegar farið er yfir þær sem voru í síðasta hópi en hún varð fyrir því óláni að slíta krossband. Hrafnhildur Hauksdóttir, Val, og Guðmunda Brynja Óladóttir, Stjörnunni, eru heldur ekki valdar að þessu sinni en þær voru með í leikjunum á móti Slóvakíu og Hollandi í apríl.

Tveir leikmenn Stjörnunnar; miðvörðurinn Anna María Baldursdóttir og miðjumaðurinn Lára Kristín Pedersen, koma inn í hópinn sem og Svava Rós Guðmundsdóttir, framherji Breiðabliks. Allar hafa farið vel af stað í Pepsi-deildinni.

Ísland mætir Írlandi ytra fimmtudaginn 8. júní og svo mætir stórlið Brasilíu í heimsókn á Laugardalsvöllinn þriðjudaginn 13. júní. Það verður síðasti vináttuleikur Íslands fyrir EM sem hefst í júlí.

Þetta er jafnframt síðasti æfingahópurinn sem Freyr velur áður en lokahópurinn veruðr kynntur í næsta mánuði. Fastamenn á borð við Hólmfríði Magnúsdóttir og Söndru Maríu Jessen eiga enn þá möguleika á að koma sér til Hollands þrátt fyrir að vera ekki í hópnum að þessu sinni en þær eru að komast aftur af stað eftir erfið meiðsli.

EM-hópurinn verður svo tilkynntur þann 22. júní.

Hópurinn:

Markverðir:

Guðbjörg Gunnarsdóttir, Djurgården

Sonný Lára Þráinsdóttir, Breiðabliki

Sandra Sigurðardóttir, Val

Varnarmenn:

Hallbera G. Gísladóttir, Djurgården

Lára Kristín Pedersen, Stjörnunni

Glódís Perla Viggósdóttir, Eskilstuna

Ingibjörg Sigurðardóttir, Breiðabliki

Sif Atladóttir, Kristianstad

Anna Björk Kristjánsdóttir, LB07

Anna María Baldursdóttir, Stjörnunni

Rakel Hönnudóttir, Breiðabliki

Miðjumenn:

Fanndís Friðriksdóttir, Breiðabliki

Dagný Brynjarsdóttir, Portland Thorns

Gunnhildur Yrsa Jónsdóttir, Vålerenga

Sara Björk Gunnarsdóttir, Woflsburg

Sigríður Lára Garðarsdóttir, ÍBV

Málfríður Erna Sigurðardóttir, Val

Andrea Rán Snæfeld Hauksdóttir, Breiðabliki

Sóknarmenn:

Agla María Albertsdóttir, Stjörnunni

Margrét Lára Viðarsdóttir, Val

Svava Rós Guðmundsdóttir, Breiðabliki

Elín Metta Jensen, Val

Katrín Ásbjörnsdóttir, Stjörnunni

Berglind Björg Þorvalsdóttir, Breiðabliki