Öruggt hjá Ítölum gegn veikburða Úrúgvæum

Ítalía vann öruggan sigur á Úrúgvæ þegar liðin mættust í vináttulandsleik í Nice í kvöld. Lokatölur 3-0, Ítölum í vil.

Ítalía komst yfir strax á 7. mínútu þegar José María Giménez skoraði sjálfsmark.

Staðan var 1-0 í hálfleik og allt fram á 83. mínútu þegar Eder skoraði annað mark ítalska liðsins. Daniele De Rossi skoraði svo það þriðja úr vítaspyrnu í uppbótartíma.

Framundan hjá Ítalíu er leikur gegn Liechtenstein í undankeppni HM 2018 á sunnudaginn.

Marga sterka leikmenn vantaði í lið Úrúgvæ í kvöld, þ.á.m. Luis Suárez, Edinson Cavani og Diego Godín.

Úrúgvæar hafa tapað fimm síðustu leikjum sínum með markatölunni 4-15.