Ótrúlegir fimm dagar Anítu

Aníta Hinriksdóttir er greinilega í frábæru formi þessa dagana. Í gær sló Aníta Íslandsmetið í 800 metra hlaupi á Demantamóti Ósló í Noregi þegar hún kom í mark á 2:00,05 mínútum. Aníta bætti eigið Íslandsmet, sem hún setti á Ólympíuleikunum í Ríó í fyrra, um níu hundraðshluta úr sekúndu.

Aníta sló þarna sitt annað Íslandsmet á aðeins fimm dögum en á sunnudaginn sló hún 30 ára gamalt Íslandsmet í 1500 metra hlaupi á móti í Hollandi.

Hlaupið í Ósló í gær var stjörnum prýtt en til marks um það voru þrjár efstu í hlaupinu þær sömu og lentu í þremur efstu sætunum í 800 metra hlaupinu á Ólympíuleikunum í fyrra.

„Að komast inn í svona hlaup er rosalega mikilvægt upp á framhaldið; að hafa mætt þessum bestu, helst nokkrum sinnum áður en þú ferð á stórmót,“ sagði Gunnar Páll Jóakimsson, fyrrverandi þjálfari Anítu, í samtali við Fréttablaðið í gærkvöldi.

„Í hlaupinu voru fimm sem voru í úrslitum á Ólympíuleikunum og ein þeirra, Lindsey Sharp, varð á eftir Anítu. Þannig að þetta var ofboðslega sterkt og gaman að hún hafi fengið tækifæri því það er hart barist um að komast í þessi hlaup.“

Aníta endaði í 6. sæti í hlaupinu í gær. Að sögn Gunnars Páls var það afar vel útfært hjá henni.

„Öfugt við heims- og Evrópumót, þá erum við með það sem við köllum héra sem heldur upp hraðanum. Aníta staðsetti sig mjög vel. Þú reynir að fljóta með og eyða sem minnstri orku,“ sagði Gunnar Páll og bætti við að Aníta væri alltaf að öðlast meiri reynslu í taktíska þættinum.

„Hún þarf að komast inn á þessi mót til að stíga skref fram á við. Hún nýtti þetta tækifæri vel.“

Síðustu mánuðir hafa verið viðburðaríkir hjá Anítu, eða frá því hún setti Íslandsmetið á Ólympíuleikunum í Ríó. Aníta gerði frábæra hluti á EM innanhúss í Belgrad í mars og náði þar í brons. Og núna hefur hún slegið tvö Íslandsmet á innan við viku.

„Þetta hefur gengið alveg lygilega vel. Það er ekkert sjálfgefið að halda áfram að taka þessi skref. Hún hefur unnið sig upp jafnt og þétt og þetta er mjög jákvætt,“ sagði Gunnar Páll.

Sumarið er bara rétt að byrja hjá Anítu. Á sunnudaginn keppir hún á öðru Demantamóti í Stokkhólmi og fram undan er svo EM U-23 ára í Póllandi og HM í London.

Gunnar Páll segir að það styttist í að Aníta brjóti múrinn og hlaupi undir tveimur mínútum.

„Þegar maður er búinn að hlaupa á svipuðum tíma getur þetta allt í einu dottið fyrir mann. Það hlaup gæti allt eins komið á sunnudaginn. Hún hefur að mínu mati getað það lengi. En það má ekki vera of mikið stress að hugsa um það. Ef þetta heldur svona áfram kemur þetta á endanum,“ sagði Gunnar Páll að lokum.