Markahrókur í miðverðinum hjá íslenska landsliðinu

Stelpurnar okkar æfðu á æfingasvæði sínu í Harderwijk í gær en í dag ferðast þær svo til Doetinchem þar sem þær mæta Sviss í öðrum leik liðsins á EM í Hollandi á laugardaginn. Leikurinn fer fram á Tjarnarhæðinni sem er heimavöllur 1. deildar liðsins De Graafschap en hann tekur um 12.000 áhorfendur.

Íslenska liðið þarf á góðum úrslitum að halda en því hefur ekki gengið vel á móti Sviss í síðustu leikjum. Ísland mætti Sviss árlega frá 2013-2015 og tapaði öllum þremur leikjunum með markatölunni 7-0. Tveir leikirnir voru í undankeppni HM 2015 og einn á Algarve-mótinu.

„Við erum með betra lið núna en þegar við höfum spilað við þær áður, að mínu mati. Við eigum mikla möguleika eins og við spilum þennan varnarleik sem við höfum verið að spila í síðustu tveimur leikjum,“ segir Glódís Perla Viggósdóttir, miðvörður íslenska liðsins.

Ekki eins góðar

Svissneska liðið tapaði í fyrsta leik fyrir Austurríki en austurríska liðið hefur verið á fljúgandi siglinu upp heimslistann undanfarin misseri. Talað er um að austurríska liðið sé núna eins og það svissneska var fyrir nokkrum árum þegar það var alltaf að pakka Íslandi saman. Þá var Sviss það lið sem var að taka mestum framförum.

„Ég held að þær séu ekki með alveg sömu gæði og Frakkar og Brasilía þannig möguleikar okkar eru góðir. Þær eru samt með frábært lið og góða einstaklinga og því þurfum við að passa okkur. En ef við spilum svona varnarleik eins og undanfarið eigum við góðan séns,“ segir Glódís Perla sem segir stelpurnar löngu hættar að hugsa um svekkelsið á móti Frakklandi.

„Við lögðum Frakkaleikinn fyrir aftan okkur og fórum strax að einbeita okkur að Sviss. Gærdagurinn fór bara í endurheimt og nú er fókusinn á Sviss og leikinn á laugardaginn.“

Frábær samvinna

Varnarleikur íslenska liðsins hefur verið virkilega góður upp á síðkastið og var hreint frábær á móti Frakklandi sem er eitt sigurstranglegasta lið mótsins. Frakkarnir fengu eitt alvöru færi á móti íslensku vörninni en ekkert úr opnum leik heldur bara skalla í slá eftir hornspyrnu. Samvinna miðvarðatríósins var hreint mögnuð.

„Við náum allar mjög vel saman. Það er alltaf góð samvinna á milli miðvarðanna sama hver miðvarðanna í hópnum eru að spila saman. Allar tölum við saman og hjálpumst að. Sama hver spilar mun þetta alltaf ganga vel,“ segir Glódís.

Það eru samt ekki bara þær þrjár aftast sem sjá um að verjast heldur er þetta liðsheildin segir hún.

„Liðið verst líka frábærlega saman. Við spiluðum frábæran varnarleik á móti Frökkum frá fremsta manni. Baráttan og viljinn og hvernig við þorðum að fara í allt gekk ótrúlega vel. Við náðum líka að þvinga þær út úr sínum leik. Það er eitthvað sem við verðum að gera á laugardaginn líka ef við ætlum að ná árangri.“

Gamall markahrókur

Þó svo að Glódís Perla hafi það að atvinnu að koma í veg fyrir að aðrir skori mörk eru ekki margir sem vita að hún var eitt sinn framherji. Glódís er uppalin hjá HK/Víkingi og skoraði fyrir liðið fjórtán mörk í ellefu leikjum í 1. deildinni árið 2011. Íslandi hefur gengið illa að skora að undanförnu en stelpurnar okkar eru ekki búnar að skora mark í fjórum leikjum í röð.

„Ég var einmitt að skjóta því að Ása [Ásmundi Guðna Haraldssyni aðstoðarþjálfara, innsk. blm.] að það ætti bara að setja mig fram,“ segir Glódís og brosir sínu breiðasta. „Nei, nei. Við munum skora. Í rauninni hef ég engar áhyggjur af þessu. Við erum búnar að fara vel yfir þetta allt saman.“



Stelpurnar fengu heimsókn frá forseta Íslands, Guðna Th. Jóhannessyni, í fyrradag. Heimsóknin lukkaðist vel þótt forsetinn hafi mætt aðeins of seint.

„Hann er frábær náungi. Hann kom alveg ótrúlega hress til móts við okkur og peppaði okkur. Hann var að tala við okkur um alls konar hluti eins og apagarða hérna í kring. Fanndís skammaði hann aðeins fyrir að mæta of seint en það var ótrúlega gaman að fá hann,“ segir Glódís Perla Viggósdóttir.

Ekki missa af neinu tengdu stelpunum okkar á EM 2017 í Hollandi. Íþróttadeild 365 er með öflugt teymi fréttamanna á mótinu og færir ykkur allar nýjustu fréttirnar af íslenska liðinu. Fylgdu okkur á Facebook og Twitter.