Soundcloud rambaði á barmi þrots

Forsvarsmenn tónlistarveitunnar Soundcloud náðu að forða fyrirtækinu frá greiðsluþroti í gær þegar þeir tryggðu því 170 milljónir dollara í hlutafjáraukningu.

Breska ríkisútvarpið BBC segir að óttaslegnir notendur þjónustunnar hafi verið byrjaðir að hlaða niður efni af Soundcloud til að varðveita það ef veitan þyrfti að leggja upp laupana í gær.

Soundcloud hefur verið í vanda statt undanfarin misseri. Í júlí var 40% starfsmanna fyrirtækisins sagt upp. Fyrr í vikunni sendi Alexander Ljung, stjórnarformaður Soundcloud, hluthöfum bréf þar sem hann sagði að án viðbótarfjármagns færi það á hausinn.

Hlutafjáraukningunni fylgja tölvuverðar breytingar á yfirstjórn fyrirtækisins og þá mun það þurfa að leita leiða til að draga úr kostnaði og afla frekari tekna. Bandaríska dagblaðið Chicago Tribune segir að Soundcloud muni nú einbeita sér frekar að því að selja tónlistarmönnum, hlaðvarpsframleiðendum og öðrum tól til að streyma efni á netinu.