Kim Kardashian er orðin ljóshærð

Kim Kardashian West er orðin ljóshærð en hún hefur verið með dökkt sítt hár í þónokkurn tíma. Kim er ein frægasta kona í heimi og er hún með meira en 103 milljón fylgjendur á Instagram. Kim  setti nýlega á markað förðunarvörur undir merkinu KKW Beauty og hafa vörurnar selst ótrúlega vel. 

Kim fór í litun og klippingu fyrir Tom Ford tískusýninguna á tískuvikunni í New York í gær. Hún vakti þar mikla athygli á bleika dreglinum fyrir sýningu. Hárgreiðslumaðurinn Chris Appelton sá um að gera þessa breytingu og staðfesti í samtali við Elle að þetta væri ekki hárkolla. Hans markmið var að hárið væri ljóst með silfruðum undirtón.

„Við höfum talað um það í langan tíma að gera Kim ljóshærða.“ 



Hann var greinilega mjög ánægður með útkomuna og deildi stoltur mynd af Kim á sinni Instagram síðu. 

Annars eru gríðarlega spennandi tímar framundan hjá Kim og fjölskyldu. Staðgöngumóðir gengur nú með barn hennar og Kanye West en TMZ og fleiri slúðurmiðlar sögðu frá því í gær að barnið væri væntanlegt í heiminn í janúar. Fyrir eiga þau soninn Saint og dótturina North. Kim hefur talað mjög opinskátt um að það var erfitt fyrir hana að verða ófrísk og meðgöngurnar voru báðar erfiðar.