Ísland tapaði 1-0 fyrir Finnlandi í Tampere í Finnlandi í dag, en leikurinn var liður í undankeppni fyrir HM í Rússlandi næsta sumar.
Eina mark leiksins skoraði Alexander Ring úr stórbrotinni aukaspyrnu eftir átta mínútna leik.
Ragnar Sigurðsson var valinn maður leiksins að Vísi, en hann átti fínan leik í vörn Íslands. Hér að neðan má sjá einkunnir og umsagnir.
Einkunnagjöf Íslands fyrir Ísland - Finnland:
Byrjunarlið:
Hannes Þór Halldórsson, markvörður 5
Gat lítið sem ekkert gert í stórglæsilegu marki Finna. Bjargaði vel frá Markanen þegar hann komst í dauðafæri undir lok leiks.
Birkir Már Sævarsson, hægri bakvörður 5
Skilaði sínu eins og alltaf. Tekinn af velli eftir klukkustundaleik til að auka sóknarþungann.
Kári Árnason, miðvörður 5
Skilaði boltanum mjög illa frá sér, sér í lagi í fyrri hálfleik. Traustur varnarlega.
Ragnar Sigurðsson, miðvörður 6 - maður leiksins
Fínn leikur hjá Ragnari eins og allri vörninni.
Hörður Björgvin Magnússon, vinstri bakvörður 5
Bjargaði vel frá Markanen í seinni hálfleik. Skilaði sínu.
Jóhann Berg Guðmundsson, hægri kantmaður 4
Ágætur í fyrri hálfleik en afleitur í þeim seinni.
Emil Hallfreðsson, miðjumaður 4
Braut klaufalega af sér í marki Finna. Kom ekkert út úr honum sóknarlega. Náði ekki að fylgja góðri frammistöðu gegn Króötum eftir.
Aron Einar Gunnarsson, miðjumaður 5
Reyndi að drífa íslenska liðið áfram. Var kominn út úr stöðu í aukaspyrnunni sem leiddi til marksins.
Birkir Bjarnason, vinstri kantmaður 4
Kom ekkert út úr honum í sókninni.
Gylfi Þór Sigurðsson, framherji 4
Hefur oft spilað betur. Íslenska liðið saknaði meira framlags frá sínum besta manni.
Alfreð Finnbogason, framherji 4
Hélt boltanum illa þegar við reyndum að byggja upp spil með að finna hann í lappir. Fyrsta snertingin sveik hann of oft.
Varamenn:
Rúrik Gíslason - (Kom inn á fyrir Birki Má Sævarsson á 59. mínútu) 3
Bjargaði á marklínu skömmu eftir að hann kom inn á. Fékk svo tvö gul spjöld með skömmu millibili, það fyrra þegar hann skafaði upp eftir Jóhann Berg og var því sendur í sturtu.
Björn Bergmann Sigurðarson - (Kom inn á fyrir Emil Hallfreðsson á 59. mínútu) 5
Duglegur, en komst lítið í takt við leikinn.
Jón Daði Böðvarsson - (Kom inn á fyrir Alfreð Finnbogason á 88. mínútu)
Spilaði of lítið til að fá einkunn.
