Fórnaði sigurveislunni fyrir íslenska landsliðið

Dagný Brynjarsdóttir gat ekki tekið þátt í sigurveislunni heima í Portland því hún var strax komin með hugann við tvo mikilvæga leiki íslenska landsliðsins í undankeppni HM.

Dagný fékk reyndar að taka þátt í smá fögnuði í Orlando eftir leikinn en svo flaug allt Portland-liðið heim.

„Ég fæ að njóta síðustu klukkutímanna í Flórída. Kærastinn minn er hérna og ég á svo flug í gegnum Ísland klukkan sjö annað kvöld (í gær). Ég verð í klukkutíma á Íslandi og svo flýg ég til Frankfurt á mánudagsmorgni (í morgun),“ segir Dagný.

„Það eru svakalegir leikir fram undan hjá okkur í landsliðinu. Þó að maður hefði alveg viljað vera hér úti í fögnuðinum þá er mikilvægt að ég komist sem fyrst til Evrópu upp á að venjast tímamismuninum svo ég verði fersk þegar ég hitti landsliðið og svo er stutt í landsleikinn á föstudaginn,“ segir Dagný.