Félagsstofnun stúdenta tekur í notkun fjölnota matarbox til að sporna gegn matarsóun og neikvæðum umhverfisáhrifum

Félagsstofnun stúdenta (FS) tekur í notkun fjölnota matarbox á veitingastofum sínum, Hámu í Háskóla Íslands. Um 4.600 skammtar af heitum mat eru seldir í Hámu í hverjum mánuði og eru fjölnota matarboxin liður í að sporna gegn neikvæðum umhverfisáhrifum einnota umbúða og matarsóunar.

Feta í fótspor Landspítalans

Samkvæmt tilkynningu frá FS voru 20.000 einnota matarbox og 78 þúsund einnota drykkjarglös keypt fyrir veitingasölur Hámu árið 2016. Því var ákveðið að sporna gegn notkun einnota drykkjarmála og 5.000 fjölnota plastglös keypt fyrir Hámu.

Nú er næsta skref að hefja sölu á umhverfisvænum fjölnota matarboxum sem seld verða á kostnaðarverði. Með þessum aðgerðum er vonast til að verði hægt að draga úr notkun einnota umbúða og einnig matarsóun þar sem nemendur taki frekar afgang með sér heim sem annars hefði farið í ruslið.

Kemur fram í tilkynningunni að matarboxin séu vottuð samkvæmt reglugerð frá Evrópusambandinu, umhverfisvæn og algjörlega án Bisfenól A (BPA) efnasambanda. Með þessu fetar FS í fótspor Landspítalans sem hefur boðið upp á álíka matarbox í matsölum sínum með góðum árangri

Stefna á að skipta út einnota borðbúnaði

„Félagsstofnun stúdenta hefur starfað með Háskóla Íslands í verkefnum er varða samfélagsábyrgð og umhverfisvernd. Flokkun á úrgangi hefur meðal annars verið innleidd á vegum háskólans og nú stígum við skrefinu lengra með því að sporna gegn notkun einnota umbúða eins og kostur er. Á háskólasvæðinu starfa og nema að jafnaði um 15.000 þúsund manns á hverjum degi og því mikilvægt að við séum lausnamiðuð í því að bæta umhverfi okkar.“ segir Guðrún Björnsdóttir, framkvæmdastjóri Félagsstofnunar stúdenta.

Þorbjörg Sandra Bakke, verkefnastjóri sjálfbærni- og umhverfismála í Háskóla Íslands, telur verkefnið mikilvægt skref í átt að því að lágmarka slæm umhverfisáhrif af starfsemi skólans:

„Innleiðing fjölnota matarboxa hjá Hámu styður mjög vel við umhverfismarkmið Háskólans sem miða að því að koma í veg fyrir óþarfa sóun, draga úr losun gróðurhúsalofttegunda og takmarka myndun úrgangs.  Við erum því mjög ánægð með þessa nýbreytni og vonumst til að smám saman verði hægt að skipta nær öllum einnota borðbúnaði sem notaður er innan Háskólans út fyrir fjölnota búnað.“