Sigmundur segir mögulega ríkisstjórn vera „hræðslubandalag“

Sigmundur Davíð Gunnlaugsson formaður Miðflokksins segir viðræður Vinstri grænna, Sjálfstæðisflokks og Framsóknarflokksins vera viðbrögð við lélegum úrslitum flokkanna í nýafstöðnum kosningum um myndun hræðslubandalags.

Sigmundur Davíð var gestur Heimis Más Péturssonar í Víglínunni á Stöð 2 í hádeginu. Hann segir vanda stjórnmálanna kristallast í viðræðunum.

„Stjórnmálin eru orðin of einsleit og búin að gefa frá sér of mikið vald til kerfisins. Nú höfum við horft upp á það að hér hafa þrír kerfisflokkar farið mjög illa út úr kosningum eins og við höfum séð samskonar flokka lenda í annarsstaðar. Framsóknarflokkurinn með verstu niðurstöðu í sögu sinni í 100 ár, Sjálfstæðisflokkurinn með næst verstu niðurstöðu í sögu sinni, og Vinstri grænum tókst að tapa næstum helmingi fylgi síns á þriggja vikna kosningabaráttu miðað við kannanir," segir Sigmundur og bætir við að viðbrögð flokkanna þriggja sé að mynda „hræðslubandalag“ og spyr sig um hvað þetta bandalag eigi að vera.

„Eins og formaður Sjálfstæðisflokksins, lýsti því í viðtali í gær, þá á þessi stjórnarmyndun að snúast um það að mati hans að menn einbeiti sér að því mynda sterka stjórn, en gera stefnu flokkana ekki að aðalatriði,“ segir Sigmundur og vitnar í orð Bjarna Benediktssonar í viðtali við mbl í gær og bætir við að þetta sé vandi stjórnmálanna.

Sigmundur segir að þessi mögulega ríkisstjórn muni skipta með sér ráðherrastólum og halda völdum, þrátt fyrir að hafa tapað. „Tapaði einmitt vegna þess að þessir flokkar hafa ekki verið að standa vörð um málefnin. Hafa fyrst og fremst verið að hugsa um að halda völdum.“

Naut aldrei stuðnings flokkseigendafélags Framsóknar

Sigmundur segir hafa verið afdráttarlaus með það í stjórnartíð sinni innan Framsóknarflokksins að hann taldi að breyta ætti flokknum. En hann segir að í flokknum sé hið svokallaða flokkseigendafélag sem hafi aðra sýn á hvernig flokkurinn eigi að vera.

„Og hefur náð sínu fram, núna að sinni að minnsta kosti. Afleiðingin er þessi að flokkurinn virðist ætla að sætta sig við að vera einhverskonar uppfyllingarefni í ríkisstjórn milli Sjálfstæðisflokks og Vinstri grænna, stjórn sem formaður flokksins sjálfur segir að snúist ekki um málefnin heldur völdin.“

Sigmundur segir að hann hafi aldrei notið stuðnings flokkseigendafélagsins svokallaða í formannstíð sinni. „Það lá fyrir alveg frá upphafi, þeir vildu mig út og náðu þeim árangri að lokum,“ segir Sigmundur og bætir við að hann hafi einungis verið studdur af almennum flokksmönnum frá upphafi.

„Það væri ómögulegt fyrir Sjálfstæðisflokkinn að ná fram sínum áherslum eða Vinstri græna að ná fram sínum, en afleiðingin yrði ekki að menn færu milliveginn í öllu, heldur kyrrstaða. Það yrði ekki ráðist í það sem yrði að gera og þau tækifæri sem blasa við yrðu ekki nýtt,“ segir Sigmundur og bætir við að við séum núna í þeirri stöðu að samfélagið megi ekki við kyrrstöðustjórn núna.

Hægt er að sjá viðtalið í heild sinni í spilaranum hér að ofan.