Margrét og Kristófer badmintonfólk ársins

Kristófer Darri Finnsson og Margrét Jóhannsdóttir eru badmintonfólk ársins, en þau voru útnefnd af stjórn Badmintonsambands Íslands.

Margrét varð þrefaldur Íslandsmeistari á árinu, en hún vann í einliðaleik, tvíliðaleik og tvenndarleik. Hún vann öll mót sem hún tók þátt í á árinu á vegum BSÍ.

Þetta var í annað skipti sem Margrét hampar Íslandsmeistaratitli í einliðaleik.

Kristófer Darri varð Íslandsmeistari í tvíliðaleik með Davíð Bjarna Björnssyni og komst í úrslit í einliðaleik.

Hann er aðeins tvítugur en á sæti í A-landsliði Íslands, ásamt því að vera Reykjavíkurmeistari í einliðaleik og tvíliðaleik.