Fjöldi stúta stöðvaður

Hið minnsta átta ökumenn voru stöðvaðir á höfuðborgarsvæðinu í gærkvöldi og nótt, grunaðir um akstur undir áhrifum vímuefna. Nokkrir þeirra höfðu misst ökuréttindi sín sökum ölvunaraksturs og aðrir aldrei öðlast ökuréttindi.

Að sögn lögreglunnar voru vímaðir ökumenn stöðvaðir á Snorrabraut, á Hafnarfjarðarvegi við Vífilsstaði, á Suðurlandsvegi við Olís, Vesturlandsvegi hjá Höfðabakka, Hverafold og á Fjallkonuvegi. Þá voru jafnframt tveir ökumenn stöðvaðir við Stekkjarbakka í Reykjavík, grunaðir um akstur undir áhrifum fíkniefna.

Á tveimur ökumanna fundust jafnframt ætluð fíkniefni. Þá fannst vopn í bifreiðinni sem stöðvuð var við Vífilsstaði. Hvers konar vopn var um að ræða fylgir þó ekki sögunni.