Ríkharður Daðason býður sig fram til stjórnar KSÍ

Ríkharður Daðason, fyrrverandi atvinnu- og landsliðsmaður í fótbolta, er einn þeirra tíu sem hafa boðið sig fram í stjórn Knattspyrnusambands Íslands en kosið verður um fjögur sæti á 72. ársþingi sambandsins annan laugardag á Hilton Hótel Nordica.

Kjörtímabili Gísla Gíslasonar, Jóhannesar Ólafssonar, Ragnhildar Skúladóttur og Rúnars Vífils Arnarson er að ljúka en Eyjamaðurinn Jóhannes er sá eini sem sækist ekki eftir endurkjöri.

Það má reikna með harðri baráttu um þetta lausa sæti og mögulega fá hin þrjú einnig mikla samkeppni en þekkt nöfn eru á meðal þeirra sjö sem bjóða sig fram ásamt þremenningunum.

Helst ber þar að nefna Ríkharð Daðason sem hefur verið í landsliðsnefnd undanfarin misseri. Þá býður Eyjamaðurinn Ingi Sigurðsson, fyrrverandi Íslandsmeistari með ÍBV, sig fram.

Helga Sjöfn Jóhannesdóttir frá Akranesi er eina konan fyrir utan Ragnhildi sem býður sig fram en þá sækist einnig Sigmar Ingi Sigurðarson, fyrrverandi markvörður Breiðabliks, eftir sæti í stjórn KSÍ.

Meira má lesa um þetta á vef KSÍ en þar má líka sjá ferilskrár allra umsækjenda nema hjá Ríkharði og Rúnari.

Tveggja ára kjörtímabili eftirtaldra í aðalstjórn KSÍ lýkur á 72. ársþingi KSÍ 10. febrúar nk.:

Gísli Gíslason, gjaldkeri Akranesi

Jóhannes Ólafsson Vestmannaeyjum

Ragnhildur Skúladóttir Reykjavík

Rúnar V. Arnarson Reykjanesbæ

Í framboði eru:

Ásgeir Ásgeirsson Reykjavík

Gísli Gíslason Akranesi

Helga Sjöfn Jóhannesdóttir Akranesi

Ingi Sigurðsson Vestmannaeyjum

Ragnhildur Skúladóttir Reykjavík

Ríkharður Daðason Reykjavík

Rúnar V. Arnarson Reykjanesbæ

Sigmar Ingi Sigurðarson Kópavogi

Valdimar Leó Friðriksson Mosfellsbæ

Valgeir Sigurðsson Garðabær