„Þá má löggan bara hirða okkur“

Skiltakarlarnir svokallaðir efna til mótmæla nú á eftir en þeir hyggjast loka dómsmálaráðuneytinu og götunni þar við.

„Já,“ segir Ólafur Sigurðsson, annar Skiltakarlanna. Og hann segir að nú verði hvergi gefið eftir. „Nú á að láta sverfa til stáls. Þá má löggan bara hirða okkur.“

Skiltakarlarnir hafa verið að koma fram á sjónarsviðið að undanförnu en þeir hafa verið lengi að. Allt frá í Búsáhaldabyltingunni; öldunni sem reis í kjölfar hruns. Þeir eru Ólafur, sem er matvælafræðingur og meindýraeyðir og Leifur A. Benediktsson verslunarmaður og bílapartasali.

„Já, meindýraeyðir. Aðallega í stærri dýrunum, risaeðlunum og svoleiðis,“ segir Ólafur í samtali við Vísi nú í morgun. Fjallhress og hvergi banginn þó hann sé þess albúinn að vera færður í járn ná á eftir, af laganna vörðum.

„Við erum með yfirlýsingu á Skiltakarlarnir á Facebook. Okkur ætlar ekki að takast að aðskilja dómsvald og framkvæmdavald, við höfum ekki stjórnarskrá, öllu stolið af okkur og lýðræðinu líka. Krafan á 20. aldar er aukið lýðræði og aukin þátttaka og þegar svona risaeðlur standa fyrir öllum breytingum þá verður þessi órói.“

Risaeðlur sem snúa öllu á haus

Ólafur er standandi bit á valdníðslu og helst á honum að skilja að hér hafi ekki orðið neinar breytingar þrátt fyrir heila Búsáhaldabyltingu.

„Svo kenna þessar risaeðlur fólkinu um óróann. Snúa öllu á haus.“

En, nú er eitthvað að gerast, telur Ólafur. Með andspyrnuhreyfingunni. „Byltingunni verður aldrei sjónvarpað.“

Ólafur vill meina að fjölmiðlar séu vængstýfðir og veiklaðir og lætur eins og hann sé ekki að ræða við blaðamann Vísis.

„Fjölmiðlar fjalla ekki um þetta. Við erum búnir að halda mótmæli frá 2009. Að frá 2009 og fengið frið fyrir fjölmiðlum. Við fórum í Landsbankann, tvö ár síðan, en, nei, aldrei verið handteknir, bara gert grín að þessu. Grín og gaman. En okkur er full alvara.“

Spillingaeyði úðað yfir svæðið

Hópur aktívista hefur slegist í lið með Skiltakörlunum og Ólafur segir sjálfsagt og rétt að taka þá með til að efla andspyrnuhreyfinguna.

„Það verður þarna hópur sem er að vinna að trúðisma (e. clovning). Þau ætla að vera með okkur. Við verðum með spillingaeyði sem við úðum yfir svæðið. Já, við ætlum að eyða allri spillingu þarna. Of nógu að taka. Þetta var reynt þegar Hanna Birna var og hét en tókst ekki betur til. Ef hún heldur áfram, Sigríður Á. Andersen, er hún þarna sem okkar besta manneskja því þá sér fólkið spillingarmyndina: dómsmálaráðherrann. Hún viðheldur þessari mynd og skoðun að Sjálfstæðisflokkurinn sé gerspilltur,“ segir Ólafur og vísar til umdeildra skipana Sigríðar í Landsrétt.

Og nú stendur til að loka ráðuneytinu. Lokað vegna spillingar. Ólafur segir að þeir séu með allar græjur til þess.

Skríðandi fasismi

Þeir Skiltakarlar urðu til í Búsáhaldabyltingunni sem áður segir.

„Já, við komum saman úr því. Við vorum saman í Lýðræðisvaktinni. Vorum að styðja við mótmæli annarra, gera skilti og auglýsingar. Mikilvægt að skilaboðin sjáist vel.“

Og það vefst ekki fyrir Ólafi að greina stöðuna og hún er svört.

„Þegar elítan er búin að taka yfir, þetta eina prósent sem lagt hefur undir sig allan auðinn og völdin, þá er mikilvægast að taka yfir lögreglu og dómsvaldið. Hanna Birna er búin að taka yfir lögregluna. Það eru ákveðnir þættir í ferli sem talað er um núna og kallast skríðandi fasismi. Þetta er að gerast, en fólk áttar sig ekki á þessu. Það er ekkert verið að tala um þetta.“

Fjölmiðlar barðir niður

En, er fólk ekki bara sæmilega sátt, langþreytt á erjum og með sæmilega fullan maga? Ánægt með sitt? Ólafur telur að það sé vegna þess að það sé búið að troða kefli uppí fjölmiðla.

„Búið að taka þá yfir fjölmiðlanna. Og ef RÚV fer að gagnrýna stjórnmálamenn er skipt um í stólnum. Það er grafið undan RÚV og á þá ráðist. Hvað heitir hún aftur, fíflið þarna í Framsóknarflokknum, sem réðst hvað ákafast á RÚV? Hótanir stjórnmálamanna gagnvart lýðræðisfyrirbærum á borð við fjölmiðla eru löngu hafnar.“

Nú er hálftími í mótmælin sem boðað er að hefjist klukkan 12 við dómsmálaráðuneytið Sölvhólsgötu en þau eiga að standa til klukkan 15. Spennandi verður að sjá hvort það verður líf í tuskum en samkvæmt Facebooksíðunni hafa um 50 boðað komu sína.

Uppfært 12:55

Rætt var við Ólaf fyrir hádegi en fréttin var uppfærð í tengslum við birtingu mynda sem ljósmyndari Vísis sendi í hús eftir að mótmælin hófust.