Fimm handteknir vegna gruns um alvarlega líkamsárás og frelsissviptingu

Fimm manns voru handteknir á Akureyri í dag vegna gruns um alvarlega líkamsárás og frelsissviptingu í gærdag á rúmlega þrítugum karlmanni.

Þetta kemur fram í tilkynningu frá lögreglunni á Akureyri en fyrst var greint frá umfangsmiklum lögregluaðgerðum á Akureyri í dag á vef RÚV.

Í tilkynningu lögreglunnar kemur fram að í aðgerðinni hafi tekið þátt lögreglumenn á Akureyri, Húsavík, Dalví og frá sérsveit ríkislögreglustjóra. Auk þess voru framkvæmdar húsleitir á nokkrum stöðum og hefur lögreglan á Akureyri notið stuðnings tæknideildar lögreglunnar á höfuðborgarsvæðinu við þá vinnu.

 

„Flestir hinna handteknu hafa komið áður við sögu hjá lögreglu ýmist vegna ofbeldismála eða fíkniefnamála. Hinir sömu hafa verið færðir til vistunar í fangageymslur lögreglu, en yfirheyrslur munu standa yfir fram á nótt og verður síðan framhaldið í fyrramálið. Í fyrramálið verður tekið ákvörðun um hvort krafist verður gæsluvarðhalds yfir einhverjum hinna handteknu, slíkt fer eftir framvindu rannsóknarinnar.

Rannsókn málsins er á frumstigi og vegna rannsóknarhagsmuna er ekki hægt að veita frekari upplýsingar að svo stöddu,“ segir í tilkynningu lögreglunnar.

Fréttin var uppfærð klukkan 15:52.