Elsa kom 78. í mark í skíðagöngu í PyeungChang

Elsa Guðrún Jónsdóttir varð í morgun fyrsta íslenska konan sem keppir í skíðagöngu á Vetrarólympíuleikunum.

Hún var á meðal þátttakenda í tíu kílómetra skíðagöngu kvenna í PyeungChang í morgun þar sem hún hafnaði í 78. sæti af 90 keppendum.

Elsa Guðrún fór brautina á 31:12,8 mínútum og var ríflega sex mínútum á eftir Ólympíumeistaranum Ragnhildi Haga frá Noregi.

Charlotte Kalla frá Svíþjóð fékk silfrið en hún var heilum 20 sekúndum á eftir þeirri norsku. Stórstjarnan Marit Björgen var svo í þriðja sæti.