Einhver þarf að sæta ábyrgð ef hægt var að koma í veg fyrir brot

Sævar Þór Jónsson, réttargæslumaður drengsins sem lagði fram kæru á hendur karlmanni sem unnið hafði með börnum hjá Reykjavíkurborg, segir að ef í ljós kemur að lögregla hefði getað komið í veg fyrir brot með því að virða verkferla deildarinnar þá sé um að ræða virkilega alvarlegt mál.

„Þá þarf einhver að sæta ábyrgð og þá sérstaklega gagnvart þeim sem það beinist að, ef það er veruleikinn,“ segir Sævar í samtali við Vísi.

Niðurstöðurnar innri athugunar lögreglu voru kynntar á blaðamannafundi á Hverfisgötu klukkan 17.15 í dag. Sigríður Björk Guðjónsdóttir, lögreglustjóri á höfuðborgarsvæðinu og Karl Steinar Valsson, yfirlögregluþjónn kynntu niðurstöður og sátu fyrir svörum.

Verkferlar verði vonandi skilvirkari með breytingunni

Sævar segir að mistök lögreglu séu allt annað en léttvæg: „Ef það kemur í ljós út frá rannsókninni að það hafi verið aðilar sem hafa verið beittir kynferðislegu ofbeldi eftir þetta tímabil þá er spurningin þessi, hefði verið hægt að koma í veg fyrir það ef menn hefðu gripið í taumana?“

Sævar segir þó að það sé mjög jákvætt að lögreglan hafi ráðist í þessa innri athugun og enn fremur að lögreglan hafi viðurkennt mistök. Hann bindur vonir til þess að verkferlar verði skilvirkari í framhaldinu. Sævar sendi tölvupóst til lögreglunnar þann 1. desember og ítrekaði hann þann 5 en hlaut engu að síður ekkert svar.

Lögreglufulltrúinn sem fékk tölvupóstinn var veikur á þessum tíma en gleymdi að taka fram að hann væri af þeim sökum fjarverandi. Hann sendi áfram tölvupóstinn til staðgengils en það leiddi heldur ekki til viðbragða. Þetta segir Karl Steinar Valsson að hafi verið fyrstu mistökin sem gerð voru í málinu en þau hafi orðið til þess að fleiri mistök voru gerð og málið fór ekki í réttan farveg.

Heimsókn móður drengsins hefði átt að kalla á viðbrögð

Sævar segir þó að samskiptaleysið hafi alls ekki verið það eina sem lögreglan gerði rangt. „Móðir umbjóðanda míns fór til lögreglunnar árið 2015. Það hefði átt að kalla á viðbrögð og úrvinnslu.“

Þáttur móðurinnar hefði þó ekki verið ræddur á blaðamannafundi lögregluyfirvalda helgaður athugun á ferli og rannsókn málsins.

Finnst þér nógu mikið hafa verið gert til að bæta fyrir mistökin?

„Satt best að segja þá finnst mér í raun og veru þetta vera mjög óljóst enn. Það er talað um skipulagsbreytingar og að það eigi að bæta við mannskap en ég veit ekki hvað felst í þessu. Þetta er mjög óljóst ennþá,“ segir Sævar.

Í þínum störfum sem réttargæslumaður, hefur þér fundist verkferlar í lagi hjá lögreglunni?

„Ég hef komið að ýmsum málum er varðar réttargæslu. Ég verð að segja það að ég hafði grun um það í langan tíma að það hafi skort verkferla innan kerfisins og í  kynferðisbrotamálum almennt. Ég hafði haft það á tilfinningunni, já.“

Fréttin var uppfærð klukkan 22.14 með viðtali við Sævar.