Meiddur Gylfi hljóp meira en félagar sínir

Þó svo Gylfi Þór Sigurðsson hafi meiðst eftir rúmlega 20 mínútna leik um síðustu helgi þá var hann samt duglegri en allir félagar sínir að hlaupa í leiknum gegn Brighton.

Eins og þjóðinni er kunnugt er óttast að Gylfi hafi skaddað liðbönd í leiknum en það stöðvaði hann ekki frá því að hlaupa eins og óður maður. Enginn hljóp yfir meira svæði og hann var í þriðja sæti yfir flesta spretti á vellinum. Ofurmaður.

Everton vann svo leikinn 2-0 en eftir á að hyggja var auðvitað mjög slæmt að hann skildi hafa spilað leikinn og það augljóslega af fullum krafti.

Gylfi Þór fór í skoðun hjá hnésérfræðingi í gærkvöldi og þjóðin bíður nú með öndina í hálsinum eftir frekari tíðindum enda var óttast í gær að hann gæti misst af HM.