Refsiaðgerðir ESB gegn Rússlandi framlengdar

Evrópusambandið (ESB) framlengdi refsiaðgerðir gegn Rússland vegna innlimunar Krímskaga og  stuðnings við uppreisnarmenn í Austur-Úkraínu um sex mánuði í dag. Leiðtogaráð ESB telur að aðstæður réttlæti ekki breytingar á refsiaðgerðunum.

Aðgerðirnar beinast að 150 einstaklingum og 38 fyrirtækjum. Eignir þeirra hafa verið frystar og möguleikar þeirra á að ferðast takmarkaðir, að því er segir í frétt Reuters-fréttastofunnar.

Rússar innlimuðu Krímskaga árið 2014 og hafa neitað að skila Úkraínu svæðinu síðan. Fulltrúar ESB og annarra vestrænna ríkja hafa einnig sakað rússnesk stjórnvöld um að styðja aðskilnaðarsinna í austurhluta Úkraínu. Tíu þúsund manns hafa fallið í átökum þar frá árinu 2014.