„Ég vissi að eitthvað hræðilegt ætti eftir að eiga sér stað út frá svipbrigðum mannsins“

„Ég fór inn á þetta heimili, sá þar karl og konu, síðan lokaði ég dyrunum og fór. Þetta er það sem ég sá,” sagði vitni við aðalmeðferð í Hagamelsmálinu svokallaða þar sem Khaled Cairo er sakaður um að hafa orðið Sanitu Brauna að bana í september síðastliðnum.

Vitnið sem um ræðir er erlendur karlmaður sem ætlaði að hitta Sanitu kvöldið sem hún dó. Hann hafði verið í sambandi við Sanitu um að hitta hana en þegar hann var kominn fyrir utan húsið hennar svaraði hún hvorki símtali frá honum né skilaboðum.

Yppti öxlum og fór út

Nágranni hleypti honum að lokum inn. Þegar hann var kominn inn í íbúðina hjá Sanitu sá hann hana og Khaled þar sem þau virtust vera að rífast.

„Þá bara yppti ég öxlum og lokaði á eftir mér,” sagði maðurinn.

Hann sagði bæði Sanitu og Khaled hafa verið fáklædd þegar inn var komið.

Hann var spurður út í hvernig hann þekkti Sanitu. Hann sagðist hafa litið svo á að þau væru í sambandi.

Khaled var mjög heitt í hamsi

Maðurinn var beðinn um lýsa frekar hvað hefði gerst þegar hann fór inn í íbúðina. Hann sagði Khaled hafa komið auga á sig og við það hefði Khaled orðið mjög heitt í hamsi.

Maðurinn lokaði dyrunum í kjölfarið.

„Ég vissi að eitthvað hræðilegt ætti eftir að eiga sér stað út frá svipbrigðum mannsins,” sagði maðurinn.

Hann talaði við nágranna Sanitu og sagðist telja að eitthvað slæmt væri í uppsiglingu. Bað hann nágrannann um að hafa samband við lögreglu og gekk svo í burtu.

Grunaði ekki að málið tæki þessa stefnu

Vitnið sagðist eiga erfitt með að rifja upp hlutina en það hefði verið auðveldara í skýrslutöku hjá lögreglu þegar atburðirnir voru nýskeðir. Hann sagðist annars staðfesta allt það sem hann sagði við lögreglu í skýrslutöku.

Hann tók fram að þegar hann yfirgaf húsið hefði hann ekki grunað að málið tæki þá stefnu sem það tók.

Nemendur varaðir við óhugnalegum myndum

Sebastian Kuntz réttarmeinafræðingur var kallaður til vitnis við aðalmeðferðina í dag. Þar fór Sebastian með nákvæmum hætti yfir dánarorsök Sanitu. Hann sagði dauðdaga hennar óvenjulegan og að mestum líkindum manndráp. Hann fór yfir margvíslega áverka hennar sem hún hafði hlotið eftir barsmíðar og kyrkingartak.

Lögfræðinemar úr Kvennaskóla Reykjavíkur sitja réttarhöldin. Fjölskipaður héraðsdómur tók það fram í tvígang að við réttarhöldin yrðu sýndar myndir úr réttarmeinarannsókn sem kynnu að vekja óhug og gætu setið eftir í huga nemendanna.

Voru þeir beðnir um að líta undan ef þeir teldu sig ekki þola slíka sýn.

Sebastian var spurður hvort einhver læknir hefði geta brugðist við öllum þeim áverkum sem Sanita varð fyrir og getað bjargað lífi hennar. Sebastian sagði um mjög miklar getgátur að ræða. Hægt væri að lifa af suma áverka en taldi ólíklegt að einhver læknir hefði geta bjargað Sanitu miðað við þá áverka sem voru á henni.

Khaled hefur haldið fram í skýrslutökum og við aðalmeðferð að Sanita hafi ekki fengið nægjanlega góða læknishjálp og þess vegna beðið bana. 

Lokað var fyrir ummæli við fréttina.