Hawking verður grafinn nærri Newton og Darwin

Aska breska stjarneðlisfræðingsins Stephens Hawking verður grafin inni í Westminsterklaustri í London nærri gröfum annarra mikilla vísindamanna eins og Isaac Newton og Charles Darwin. Afar fáir verða þess heiðurs aðnjótandi.

Hawking lést í síðustu viku, 76 ára að aldri. Hann var einn þekktasti vísindamaður samtímans, bæði fyrir rannsóknir hans á svartholum og uppruna alheimsins en ekki síður vegna hreyfitaugungahrörnunar sem hrjáði hann nær öll fullorðinsár hans.

Kóngafólk og nokkrir mikilvægustu einstaklingar í sögu Bretlands eru grafnir í Westminsterklaustrinu. Í tilkynningu frá klaustrinu kom fram að haldin verður sérstök þakkargjörðarmessa til heiðurs Hawking síðar á þessu ári. Þá verði aska hans grafin.

Newton var grafinn í Westminster árið 1727 en hann lagði grundvöllinn að nútímastærðfræði og setti fram kenninguna um þyngdaraflið. Darwin, höfundur þróunarkenningarinnar, var grafinn nærri Newton árið 1882, að því er kemur fram í frétt Reuters-fréttastofunnar.

Síðustu vísindamennirnir sem voru grafnir í Westminster voru þeir Ernest Rutherford, frumkvöðull í kjarneðlisfræði árið 1937 og Joseph John Thomson árið 1940. Thomson uppgötvaði rafeindir.