Vann skemmdir á bíl sem var lagður í stæði fyrir utan kosningaskrifstofu Sjálfstæðisflokksins

Lögreglan á Vesturlandi leitar að einstaklingi sem vann skemmdir á bifreið sem var lögð í stæði fyrir utan kosningaskrifstofu Sjálfstæðisflokksins á Akranesi í nótt.

Greint er frá þessu á Facebook-síðu lögreglunnar en þar kemur fram að bifreiðin sé í eigu konu á besta aldri. Konan hafði lagt bifreiðinni í stæði fyrir utan kosningaskrifstofu Sjálfstæðisflokksins á Kirkjubraut um miðnætti í gær.

Þegar konan kom að bifreiðinni í morgun var búið að kasta bjórflösku í gegnum afturrúðu bílsins.

Lögreglan segir konuna ekki tryggða fyrir tjóninu og óskar lögreglan eftir upplýsingum um hver var þarna á ferðinni ásamt því að skora á þann sem gerði þetta að gefa sig fram.