Ólafsfjarðarvegi lokað vegna umferðarslyss

Umferðarslys varð um klukkan fjögur í dag á Ólafsfjarðarvegi er rúta hafnaði út af veginum. Tveir voru í rútunni, farþegi og ökumaður, sem baðir hafa verið fluttir á sjúkrahús en ekki er vitað um meiðsl þeirra. Þetta kemur fram í tilkynningu frá lögreglunni á Norðurlandi eystra.

Veginum var enn lokað milli Hjalteyrarafleggjara og Hofs seint á fimmta tímanum. Unnið er að rannsókn á vettvangi og verður vegurinn lokaður einhvern tíma enn.

Í fyrri tilkynningu frá lögreglunni á Norðurlandi eystra kemur fram að hjáleið sé um Bakkaveg númer 812 og Hjalteyrarveg númer 811.

Fréttin hefur verið uppfærð.