Kýldi húsráðanda í kviðinn og flúði lögreglu á ofsahraða

Lögreglan á Austurlandi segir að íbúi á Fáskrúðsfirði hafi komið að innbrotsþjófi í íbúð sinni í hádeginu. Þjófurinn hafi veitt íbúanum bylmingshögg í kviðinn og síðan komist undan á hlaupum. Tveir menn voru handteknir eftir stutta eftirför lögreglu.

Maðurinn ók bifreið sinni á ofsaferð frá Fáskrúðsfirði á Breiðdalsvík, að því er segir í Facebook-færslu lögreglunnar á Austurlandi. Þar setti lögregla upp stöðvunarpóst sem ökumaður bifreiðarinnar sinnti ekki og var henni ekið fram hjá lögreglubifreiðinni og út af veginum.

Bifreiðin var þó á lítilli ferð þegar henni var ekið útaf svo ekki hlutust slys af. Tveir sem voru í bifreiðinni voru handteknir og eru þeir nú í haldi lögreglu, grunaðir um þjófnaðarbrot á nokkrum stöðum á landinu.

Lögreglu grunar að um sé að ræða skipulagða brotastarfssemi.