Slasaðist í Smárabíói

Kona slasaðist töluvert þegar hún hugðist yfirgefa kvikmyndasal í Smárabíó í gærkvöldi. Í skeyti lögreglunnar er konan sögð hafa dottið í tröppum og hlotið við það áverka í andliti. Einnig er talið líklegt að konan hafi handleggsbrotnað við fallið. Hún var því flutt á slysadeild til aðhlynningar á níunda tímanum í gærkvöldi.

Lögreglan hafði jafnframt afskipti af manni, sem er sagður hafa verið í annarlegu ástandi, við Austurstræti síðdegis í gær. Hann er þar talinn hafa veist að fólki sem tilkynnti manninn til lögreglu. Maðurinn var handtekinn og fluttur í fangageymslu þar sem hann hefur sofið úr sér vímuna.

Þá var fjöldi ökumanna stöðvaður í gærkvöldi og nótt vegna gruns um akstur undir áhrifum vímuefna. Einn þeirra ók jafnframt langt yfir hámarkshraða, annar hafði áður verið sviptur ökuréttindum og sá þriðji var á ótryggðri bifreið.