230 þúsund króna sekt fyrir hraðaakstur á Reykjanesbraut

Tuttugu ökumenn voru kærðir fyrir of hraðan akstur um helgina í umdæmi lögreglunnar á Suðurnesjum. Sá sem hraðast ók mældist á 152 kílómetra hraða á Reykjanesbraut þar sem hámarkshraði er 90 kílómetrar á klukkustund. Þess ökumanns bíður 230 þúsund króna sekt, svipting ökuleyfis í tvo mánuði og þrír refsipunktar í ökuferilsskrá. Þrír til viðbótar mældust á yfir 130 kílómetra hraða en aðrir sem kærðir voru óku heldur hægar.

Þá hafði lögregla afskipti af tveimur piltum sem óku greitt á mótorkrosshjólum um götur í umdæminu. Lögregla ræddi við aðstandendur þeirra svo og piltana og leiddi þeim fyrir sjónir að svona háttalag væri ekki liðið.

Enn fremur var ungur ökumaður staðinn að því að spóla inni í hringtorgi með þeim afleiðingum að bifreiðin hafnaði upp á torginu. Rætt var við piltinn sem og móður hans sem gert var viðvart um hegðun hans í umferðinni.