Ríkisstjórn Ástralíu tapar þingmeirihluta sínum í kjölfar hallarbyltingar

Malcolm Turnbull, fyrrverandi forsætisráðherra Ástralíu, hefur sagt af sér sem þingmaður. Afsögnin þýðir að ríkisstjórn Frjálslynda flokks hans hefur ekki lengur meirihluta á þingi og þarf nú að reiða sig á óháða þingmenn til að koma málum í gegn.

Turnbull var steypt af stóli sem leiðtogi flokksins í síðustu viku. Reuters-fréttastofan segir að hann hafi nú sagt af sér sem þingmaður. Frjálslyndi flokkurinn hafði eins manns meirihluta í neðri deild þingsins. Ríkisstjórnin þarf því að reiða sig á stuðning annarra þingmanna þar til aukakosningar um sæti Turnbull fara fram.

Aðeins átta mánuðir eru til þingkosninga í Ástralíu en bandalag miðhægriflokka sem Frjálslyndi flokkurinn tilheyrir hafa átt undir högg að sækja í skoðanakönnunum.