Ótrúlegt borðtennisskot í Vestmannaeyjum krafðist 1.600 tilrauna

Eyjapeyjarnir Rúnar Gauti Gunnarsson og Kristófer Tjörvi Einarsson hafa vakið mikla athygli athygli fyrir myndbönd sín þar sem þeir framkvæma flókin golf- og borðtennishögg.

Rúnar er fimmtán ára og Kristófer sautján ára en þeir hófu þessa myndbandagerð í janúar árið 2016. Þeir byrjuðu á því að gera golfmyndband og færðu sig yfir í borðtennismyndbönd en hafa augastað á öðrum íþróttum á borð við pool, körfubolta og pílukast.

Mikil vinna er að baki hverju myndbandi en þeir hafa varið nokkrum klukkutímum í að ná að framkvæma ótrúleg högg, sum þeirra nást en önnur ekki.

„Meðaltíminn á flottu trixi er eitthvað um 30 til 60 mínútur,“ segir Rúnar Gauti í samtali við Vísi.

Að sögn félaganna á Kristófer Tjörvi magnaðasta höggið sem þeir hafa náð að framkvæma. Kristófer stóð þá fyrir utan bílskúrsdyr þar sem hann sló borðtenniskúlu inn í skúrinn og í gegnum límbandsrúllu í átta metra fjarlægð. Þeir benda á að borðtenniskúla er um fjórir sentímetrar í þvermáli og límbandsrúllan um sex sentímetrar.

„Þannig að nákvæmnin þarf að vera ansi mikil,“ segir Rúnar Gauti.

Myndbandið má sjá hér fyrir neðan: