Ólafur Ragnar um framtíð norðurslóða í Víglínunni

Fyrir frumkvæði og elju Ólafs Ragnars Grímssonar fyrrverandi forseta Íslands er Reykjavík orðin helsti vettvangur stjórnmálamanna, vísindamanna, talsmanna frumbyggja, náttúruverndarsamtaka og viðskiptalífs til umræðu um málefni norðurslóða. Um helgina þinga um tvö þúsund fulltrúar frá 50 ríkjum heims á Hringborði norðurslóða í Hörpu. Heimir Már Pétursson fréttamaður fær Ólaf Ragnar til sín í Víglínuna á Stöð 2 og Vísi í hádeginu.

Við ræðum við formann Hringborðs norðurslóða um þennan vettvang þar sem fólk úr ólíkum áttum kemur árlega saman og áhersla er lögð á að láta ekki milliríkjadeilur um önnur mál ekki koma í veg fyrir að allir sem hagsmuna eiga að gæta varðandi norðurslóðir og áhrif loftlagsbreytinga geti komið saman. Viðrað sjónarmið og kynnt sér nýjustu rannsóknir og kenningar fremstu vísindamanna heims.



Hanna Katrín Friðriksson þingflokksformaður Viðreisnar og Ólafur Þór Gunnarsson þingmaður Vinstri grænna koma einnig í Víglínuna til að ræða það sem efst var á baugi í hinni pólitísku umræðu þessa vikuna. Þar má nefna frumvarp þingkvenna úr öllum flokkum á Alþingi um ætlað samþykki fyrir því að vera upplýstur um sjúkdóma sem kunna að greinast í vísindarannsóknum. Þá kom athyglivert svar frá dómsmálaráðherra við fyrirspurn um lagalega stöðu umskurðar á drengjum, forsætisráðherra flutti skýrslu um nýja peningamálastefnu og umfangsmesta heræfing seinni tíma fer nú fram á Íslandi og við strendur landsins.

Víglínan er í opinni dagskrá og beinni útsendingu á Stöð 2 og Vísi klukkan 12:20.