Boston Celtics fyrsta liðið til að leggja Milwaukee Bucks að velli

Boston Celtics varð í nótt fyrsta liðið til að leggja Milwaukee Bucks að velli á þessari leiktíð í NBA körfuboltanum en Bucks var eina taplausa lið deildarinnar þegar kom að leik liðanna í TD Garden í nótt.

Kyrie Irving var stigahæstur í liði Celtics með 28 stig í 117-113 sigri þar sem Celtics settu niður 24 þriggja stiga skot. Giannis Antetokounmpo var atkvæðamestur gestanna með 33 stig og 11 fráköst.

Kamerúnska tröllið Joel Embiid minnti á sig með því að skora 41 stig í níu stiga sigri Philadelphia 76ers á Los Angeles Clippers, 122-113. Þá skilaði De´Aron Fox frábærum tölum í útisigri Sacramento Kings á Atlanta Hawks. Leikstjórnandinn ungi gerði 31 stig, tók 10 fráköst og gaf 15 stoðsendingar.

Úrslit næturinnar

Charlotte Hornets 107-111 Oklahoma City Thunder

Cleveland Cavaliers 91-110 Denver Nuggets

Philadelphia 76ers 122-113 Los Angeles Clippers

Atlanta Hawks 115-146 Sacramento Kings

Boston Celtics 117-113 Milwaukee Bucks

Portland Trail Blazers 132-119 New Orleans Pelicans