Hverfisbarinn harmar ummæli um transkonu en vísar í reglur um klæðaburð

Skemmtistaðurinn Hverfisbarinn við Hverfisgötu í miðbæ Reykjavíkur hefur sætt mikilli gagnrýni í dag eftir frásagnir systra sem vikið var af staðnum í gærkvöldi.

Rakel Brandt greindi frá atburðinum á Twitter síðu sinni í dag þar sem hún sagði að þeim hefði verið vísað á dyr vegna þess að systir hennar væri transkona.

Rekstrarstjóri Hverfisbarsins segir að á staðnum gildi reglur um klæðaburð og það hafi verið ástæðan fyrir því að fólkinu var vísað út. Enginn starfsmaður hafi vitað að um transkonu væri að ræða.

Hverfisbarinn bauð mig velkomna með afmælið mitt en rak mig svo úr fyrir að elskulega systir mín er trans , fokk hverfisbarinn - ekkert buisness þar, endilega vekið athygli!!! Ojjj

— sultuslöklök (@glytta) November 10, 2018

Geta ekki hleypt gaur í kellingapels inn á staðinn

Í samtali við Fréttablaðið segir Rakel að hún hafi verið að halda upp á afmæli sitt á staðnum þar sem Hverfisbarinn hafði boðið henni og föruneyti hennar sérkjör á drykkjum. Rakel segist hafa mætt með systur sinni, Sæborgu Ninju Guðmundsdóttur, á skemmtistaðinn snemma kvölds en Sæborg er transkona.

Fréttablaðið hefur eftir Sæborgu að dyravörður staðarins hafi sett út á klæðaburð þeirra systra og tjáð þeim að þær mættu bara vera á staðnum til miðnættis. Sæborg segir að um klukkan ellefu hafi þeim systrum hins vegar verið gert að yfirgefa staðinn.

Rakel segist hafa spurt dyravörðinn hvort þeim hefði verið vísað frá vegna þess að Sæborg væri trans. Mun dyravörðurinn hafa sagt þeim að þær mættu túlka þetta eins og þær vildu.

Ída Finnbogadóttir, vinkona Rakelar, hefur eftir téðum dyraverði að hann geti ekki bara hleypt gaur í kellingarpels inn á staðinn.

Hann orðrétt „gat bara ekki hleypt gaur í kellingapels inn á staðinn“

— Ída Finnbogadóttir (@idafinnbogad) November 11, 2018

Hverfisbarinn hefur verið gagnrýndur harðlega í kjölfar atburðarins og rignir yfir staðinn neikvæðum umsögnum á Facebook-síðu staðarins.

Stúdentahreyfingin Röskva brást við frásögninni með því að hætta við að halda stærsta viðburð sinn á skólaárinu, Ragnarrök, á staðnum.

Röskva birti yfirlýsingu á Facebook-síðu sinni og í henni segir að Röskva standi fyrir jafnrétti og vilji að öllum líði vel á atburðum fylkingarinnar. Því hafi Röskva ákveðið að færa viðskipti sín annað.

Vilja koma í veg fyrir að atvik sem þessi endurtaki sig

Cesar Santi, rekstrarstjóri Hverfisbarsins, sendi Vísi skriflega yfirlýsingu vegna gagnrýninnar. Þar kemur fram að dyraverðir hafi ekki vitað að transmanneskja væri á meðal þeirra sem vísað var á dyr.

„Það sækir fjöldinn allur af fólki staðinn hjá okkur og við bjóðum þau öll velkomin. Við setjum hins vegar reglur varðandi lágmarksaldur og klæðaburð.“

Tilkynninguna sem Cesar sendi Vísi má sjá hér að neðan.

„Enginn starfsmaður vissi til þess að trans manneskja hafi verið í hópnum sem hafi verið vísað frá Hverfis, dyravörður hefur látið úr sér óþarfa ummæli sem endurspegli ekki gildi Hverfisbarsins og við hörmum það innilega. Fundur mun verða tekinn með dyravörðum til að passa upp á að svona atvik endurtaki sig ekki. Engu að síður þá hafi starfsmenn verið að vinna eftir dresscode sem staðurinn setur, það sækir fjöldinn allur af fólki staðinn hjá okkur og við bjóðum þau öll velkominn. Við setjum hins vegar reglur varðandi lágmarksaldur og klæðaburð.“